Tuesday, March 25, 2014

பொங்கல், சட்னி, சாம்பார்...

இந்த பொங்கல்,சட்னி சாம்பார் காம்பினேஷனை கண்டுபிடித்தவரை கண்டுபிடித்து பொங்கல் வைத்து கோயில் கட்ட வேண்டும்...

எழுந்தவுடன், இன்னைக்கு பொங்கல் என்று ப்ரக்ருதி சொன்னதிலிருந்து நாள் சூடு பிடிக்க ஆரம்பித்து விட்டது...  சமையலறைப்பக்கம் மூக்கும் காதும் வைத்து காத்திருந்தேன்...

சமையலறையிலிருந்து சட்னிக்கு தாளிக்கும் சத்தம் வந்தபோது `குழலினிது யாழினிது என்போர், கடுகு தாளிக்கும் சத்தம் கேளாதோர்` என்று வயிறு மூளைக்கு சொல்லியது... பொங்கல் ரெடியென்று  குக்கரும் தன் பங்குக்கு கூவியது...இந்த சேர்ந்திசைக்கு ஏற்ப வயிறும் பசியில் தாளம் போட ஆரம்பித்தது...

வள்ளுவன் இருந்திருந்தால்,

"செவிக்குணவு தாளிக்கும் சத்தம் பொங்கல்
வயிற்றுக்கும் ஈயப்படும்"

என்று பாடியிருப்பான்....எனக்கென்னவோ வாசுகி வள்ளுவருக்கு பொங்கல் செய்து கொடுத்திருக்க மாட்டார் என்று என்னுடைய பொங்கலில் மயங்கிய உள்ளுணர்வு கூறுகிறது...

இஞ்சியும், மிளகும் நெய்யில் தாளிக்கப்படும்போது வரும் மணத்திற்கு என் சொத்தையே எழுதிக்கொடுக்கலாம்... இதை செய்யும் கைக்கு தங்கக்காப்பு செய்து போடலாம்...(ப்ரக்ருதிக்கு, தமிழ் படிக்கத்தெரியாது... )

"பொங்கல் ரெடி" என்று ப்ரக்ருதி தட்டோடு வந்தபோது எனக்குண்டான பரவச நிலையை விளக்க வார்த்தைகள் பத்தாது... "இருபது கோடி நிலவுகள் கூடி" என்று ப்ரக்ருதியை பார்த்து பாடத்தோன்றியது....

தட்டை மூன்றாக பாகமாக பிரித்துக்கொண்டு, ஒரு பாகத்தில் பொங்கல், இரண்டாம் பாகத்தில் சாம்பார், மற்றதில் சட்னியும் இட்டு, அது மூன்றும் சந்திக்கும் இடம் பாருங்கள், இதைத்தான் திரிலோக சங்கமம் என்று சொல்லியிருப்பார்களோ !!!

இந்த சங்கமத்தில் கை வைத்து மூன்றையும் குழைத்து  வாயில் வைத்தால் நாக்கிற்கு சுவைக்ககூட அவகாசம் கொடுக்காமல் இளஞ்சூட்டில், நெய்யின் வழவழப்பில்  அப்படியே தொண்டையில் வழுக்கிக்கொண்டு போகும் பாருங்கள்.... தேவாம்ருதம்.... தேவாம்ருதம்...!!!

இந்த தேங்காய் சட்னி பாருங்கள்...தாளித்த போது வறுபட்ட கருவேப்பிலையில் கூட தனி சுவை... முருங்கைக்காய் சாம்பாரும், பொங்கலில் எட்டிப்பார்க்கும் நெய்யில் வறுத்த முந்திரியும், போட்டி போட்டுக்கொண்டு, நீ சுவையா, நான் சுவையா என தனி ஆவர்த்தனம் வாசித்ததில் நாவிற்கும், வயிற்றிற்கும் ஒரே கச்சேரிதான்...

இதையெல்லாம் அனுபவித்து அனுபவித்து சாப்பிட்டு முடித்து நிதானத்திற்கு வருவதற்க்குள், "இந்தாங்க மச்சான் டீ..." என்று எதிரில் நின்ற ப்ரக்ருதியை பார்த்து மனதில் காதல் பொங்கலோ பொங்கு என்று பொங்கியது...


2 comments:

ராஜி said...

எங்க வீட்டுக்காரருக்கு பொங்கல் உதிரி உதிரியா கையில ஒட்டாம இருக்கனும். என் பசங்களுக்கு குழைவா நெய் அதிகம் விட்டு செய்யனும். இந்த இருக் கட்சிகளுக்காகவே பொங்கல் செய்யுறதையே விட்டுட்டேன்

குட்டன் said...

படம் பார்த்த மனம் ஏங்குதே பொங்கலுக்காய்!