தேம்ஸ் நதிக்கரையோரம்...

தீபாவளி விழா 2007 !!!

2007-10-26T17:58:00.000+01:00

ஒரு விழாவை ஏற்பாடு செய்து எடுத்து நடத்துவதுதான் எவ்வளவு கடினமான காரியம் !!! டுபுக்கு மற்றும் சக்ராவின் முயற்சியால் இந்த முறை தீபாவளி சந்திப்பு நிகழ்ச்சிக்கு ‍Hemel Hempstead-ல் எல்லோரும் சந்தித்தோம். அருமையான விழாவாக அமைந்திருந்தது.

விழாவின் முக்கிய அம்சமாக மூன்று சிறுவர்கள் சிவாஜி பாட்டுக்கு ஆடிய நடனம் தூள் கிளப்பியது. அதன் பிறகு ரங்கா மற்றும் குழுவினர் ‍fashion show-வில் பட்டையை கிளப்பினார்கள். பிறகு சரண்யா மற்றும் நண்பர் ஆடிய நடனம் மெய் சிலிர்க்க வைத்தது...

அடுத்துதான் முக்கியமான ஒன்று... சாப்பாடு.... வாவ்... போனமுறை போலவே இந்த முறையும் அருமையாக அமைந்திருந்தது.

அதன் பிறகு நடத்தப்பட்ட‌ குழு போட்டிகள் மிகவும் நன்றாக வந்திருந்தது... கல்லூரி நாட்களை நினைவு படுத்தியது.

அதைவிட சுவாரசியமான விஷயம் குழுவிற்க்கு வைக்கப்பட்ட பெயர்கள்.
1) ப்லேடு பக்கிரி,
2) ரவுசு ராணி
3) அல்டாப்பு அலமேலு
4) பட்டாசு பாலு
5) பால் பாண்டி
6) லார்டு லபக்கு தாஸ் &
7) மொக்கை ராசு

Snacks competition ஒன்று வைத்திருந்தார்கள்.... அதற்கு நான் நடுவர் வேறு. ஆஹா !!! புகுந்து விளையாடி விட்டேன் சும்மா !!! மூன்று நடுவர்கள். கடைசியில் போட்டியில் ஜெயித்தது மிசஸ் டுபுக்கு...சில பேர் Match fixing என்று சொல்லிக்கொண்டு திரிகிறார்களாம் !!! என்ன கொடுமை சரவணன் இது !!!!

மொத்தத்தில் மறக்க முடியாத அருமையான சந்திப்பு...புகைப்படங்கள் கீழே !!!

DeepavaliParty2007

புகைப்படப்போட்டிக்காக...

2007-08-04T21:04:00.000+01:00

புகைப்படப்போட்டிக்காக நான் எடுத்த எனக்குப்பிடித்த எந்தவித மாற்றங்களும் செய்யப்படாத புகைபடம்.

விகடனில் படித்த ரசித்த கவிதை...

2007-07-28T20:45:00.000+01:00

நானாக அவனும் அவனாக நானும்
சாத்தியமில்லை
எனது சந்தோஷங்கள் அவனது சந்தேகங்கள்
எனது ஆசைகள் அவன் கற்பனை செய்யாதவை
அவனது ஆசைகள் என்னை அடிமைகொள்பவை
எனது கற்பனைகள் அவனுக்குப் புரியாதது
அவனது கற்பனைகள் அலுத்துப்போனவை
எனது நோக்கு அவனுக்குப் புதியது
அவனது நோக்கு எனக்குப் பழையது
அவன் வளர்ந்தும்... நான்
நான் குழந்தை... அவன்
நான் அவனாவதும் அவன் நானாவதும்
சாத்தியமே இல்லை
நான் நான் அவன் அவன்

-றஞ்சனி

சுஜாதா ரசித்த தமிழ் ராப்...

2007-07-14T23:08:00.000+01:00

ஆனந்த விகடனில் சுஜாதா ரசித்ததாக எழுதிய தமிழ் ராப்....

மழலை மொழியில்... முன்பே வா !!!

2007-07-01T10:05:00.000+01:00

மழலை மொழியில்... முன்பே வா !!!

ஆகா !!! எத்தனை அழகு !!!!

ஜோதிகாவா? சவுந்தர்யாவா?

2006-11-05T19:44:00.000Z

இன்று utube-ல் மேய்ந்துகொண்டு இருக்கும்போது இது கிடைத்தது. எனக்கென்னவோ சவுந்தர்யா இதில் சிறப்பாக பண்ணியிருக்கிறார் என்று தோன்றுகிறது.

miss-பண்ணிய ஒரே விஷயம் 'என்ன கொடுமை சரவணன்' :-)

இனி தமிழில்,

மவுனத்தை முறிக்க....

2006-10-31T20:02:00.000Z

பதிவு எழுதி ரொம்ப நாள் ஆகிறது... எப்படி திரும்ப ஆரம்பிப்பதென்று தெரியவில்லை... தற்போதைக்கு நீண்ட நாள் மவுனத்தை முறிக்க லண்டன் சென்றபோது சுட்ட சில புகைப்படங்கள்.

கலக்கிய கானா.....

2006-06-18T08:50:00.000+01:00

இந்த உலகக்கோப்பை போட்டிகளில் எதிர்பார்க்கப்பட்ட பெரிய அணிகள் அனைத்தும் சொதப்பி வருகின்றன... ஒரு ஆட்டம் கூட சுவாரசியமாக இல்லை...

நேற்று நடந்த கானா மற்றும் செக் குடியரசுக்கு இடையே நடந்த போட்டி அருமையான ஒன்றாக அமைந்து இருந்தது...கானாவின் ஆட்டம் யாரும் எதிர்பாராத விதமாக அற்புதமாக இருந்தது. இதற்கு முந்திய போட்டியில் இத்தாலியுடனான போட்டியில் கானா நன்றாக விளையாடியும் தோற்றுப்போனது துரதிஷ்டவசமானது.

கானா அடுத்து USA-வை சந்திக்க உள்ளது. எளிதாக வெல்லும் என்று எதிர்பார்க்கலாம்.

இப்போதைக்கு என்னுடைய favourite கானா தான்.

கோயில்களில் தொலைந்து போகும் மன அமைதி...

2006-06-13T08:24:00.000+01:00

இந்த முறை இந்தியா சென்றிருந்த போது இராமேஷ்வரம் மற்றும் திருப்பதிக்கு செல்ல நேர்ந்தது. அப்போது அங்கு ஏற்பட்ட அனுபவங்களை உங்களுடன் பகிர்ந்து கொள்ளலாம் என்று தோன்றியதன் விளைவு இந்த பதிவு.

இராமேஷ்வரம் போய் இறங்கியவுடன் guide-களின் தொல்லை ஆரம்பித்து விட்டது... வேண்டாம் என்றாலும் அவர்கள் விடுவதாக இல்லை. பின்னாலேயே துரத்தி வந்து தொல்லை. அதற்குப் பிறகு வாளிகளை வைத்துக்கொண்டு தீர்த்தம் இறைத்து ஊத்துவதற்கு ஒரு பெரிய கோஷ்டி நின்று கொண்டிருக்கும். வெளியே உள்ள கோயில் தீர்த்தக் கவுண்டரில் சீட்டு வாங்கி முறையாக சென்றால் ஒரு நாள் முழுவதும் தீர்த்தம் இறைத்து ஊற்றுபவர்களுக்காக காத்துக்கொண்டு நின்று கொண்டிருக்க வேண்டியது தான்.

இவையாவது பரவாயில்லை. உள்ளே அர்ச்சகர்கள் பண்ணும் அட்டூழியம் தாங்க முடியாது. அர்ச்சனைத் தட்டில் ரூபாய் 50 வைத்தால் தான் அர்ச்சனை பண்ணுவேன் என்று உட்கார்ந்துவிட்டார். அதை வாங்கி அவருக்கென்று ஒரு பெரிய பை ஒன்று இருக்கிறது அதில் வைத்த பின்புதான் பூஜையையே ஆரம்பிக்கின்றார். பூஜை பண்ணியவுடன் தீபாரதணைத்தட்டை வேறு ஒருவரிடம் கொடுத்துவிட்டு அவர் சென்று விட்டார். அதை கொண்டு வந்து காண்பிக்கும் வேறு ஒரு அர்ச்சகர் பணம் போடச்சொல்லி வெளிப்படையாக கத்துகிறார்.

இப்போதெல்லாம் கோயில்களுக்குச்சென்றால் முன்பு இருந்தது போல் மன அமைதி கிடைப்பதில்லை. ஏதோ போருக்கு போய் திரும்பிய ஒரு அலுப்புத் தான் ஏற்படுகிறது.

இனிமேலெல்லாம் கோயில்களுக்கு சென்றால் இறைவனை தூரத்திலிருந்து தரிசித்துவிட்டு ஒரு ஓரமாக உட்கார்ந்திருந்து கோயிலின் அமைதியை உணர்ந்துவிட்டு, சிற்பங்களை ரசித்துவிட்டு வரலாம் என்று முடிவெடுத்திருக்கிறேன்.

புது வீடு மாற்றலும்... இணையத்தொடர்பும்...

2006-02-23T20:22:00.000Z

அப்பாடா!!! ஒருவழியாய் இணைய தொடர்பு கிடைத்து விட்டது.

புது வீட்டிற்கு மாற்றலாகி இன்றோடு இரண்டு மாதங்கள் ஆகிவிட்டன. பழைய வீட்டில் இருந்த இணையத் தொடர்பை புது வீட்டிற்கு மாற்றச்சொல்லி விண்ணப்பித்து தினமும் தொலைபேசியில் தொடர்புகொண்டு ஞாபகப்படுத்தி... இந்தா அந்தாவென்று இழுத்தடித்து...... கடைசியில் ஒருவருட கான்ட்ராக்டிலிருந்து விடுவித்துவிடுங்கள் என்று சொல்லி.....ஒருவழியாய் புது இணையத்தொடர்பு கிடைத்தாகிவிட்டது. முன்பு கொடுத்துக்கொண்டு இருந்த அதே பணத்திற்கு 2 MBPS அகலப்பாட்டை இணைப்பு.

வந்து தமிழ்மணம் பார்த்தால், அப்படி ஒரு ஆச்சரியம்... எத்தனையோ புதுமுகங்கள். பார்க்கவே சந்தோஷமாக இருக்கிறது.

இனி அடிக்கடி சந்திக்கலாம்...

பிபிசி தமிழோசையின் பாட்டொன்று கேட்டேன்

2005-12-01T20:21:00.000Z

ஆஹா!! எவ்வளவு அருமையான ஒரு நிகழ்ச்சி. லண்டனில் தீபாவளிக் கொண்டாட்டத்துக்குப் பிறகு கலந்து கொண்டவர்கள் அனைவரும் தொடர்பில் இருப்பதாக முடிவெடுத்து டுபுக்கு ஒரு யாஹூ குழுமம் ஆரம்பித்தார். அதில் ரோஹினி வெங்கடஸ்வாமி அவர்கள் 'பாட்டொன்று கேட்டேன்' பற்றி எல்லோருக்கும் தெரியப்படுத்தி இருந்தார். அறிமுகப்படுத்தியதற்கு அவருக்கு முதலில் நன்றி.

இது வரைக்கும் அறுபது பகுதிகள் வெளியாகி இருக்கின்றன. அனைத்து பகுதிகளுக்கும் சுட்டிகள் பிபிசி தமிழ் இணையத்தளத்தில் இன்றும் கேட்க கிடைக்கின்றன. இதோ சுட்டி உங்களுக்காக.

சம்பத் குமார் அருமையாக தொகுத்து வழங்கியிருக்கிறார். எனக்குத்தெரிந்ததெல்லாம் இளையராஜாவிற்கு பிறகான தமிழ் திரையிசையைப்பற்றித் தான். அதற்கு முன்பான தமிழ் திரையிசை வரலாற்றினைப்பற்றிய ஒலித்தொகுப்பை இசையுடன் கேட்கும்போது ரொம்பவே மகிழ்சியாக இருந்தது. ஏன்?.. இளையராஜாவின் இசையில் வெவ்வேறு பாடகர்கள் பாடிய பாடகர்கள் பாடிய பாடல்களை சம்பத் குமார் அவர்கள் தொகுத்து வழங்குவதை கேட்கும்போது அதைப்பற்றிய பல விஷயங்கள் தெரிய வந்தன.

நிகழ்ச்சி இன்னும் வந்து கொண்டு இருக்கிறது. நிகழ்சியைப்பற்றி மேலும் தகவல்களை சொல்லி உங்களை போரடிக்க விரும்பவில்லை. நீங்களே கேட்டுப் பாருங்கள்.

50 First Dates - பட விமர்சனம்

2005-11-13T17:06:00.000Z

ரொம்ப நாளைக்கு அப்புறம் படம் பார்த்தபின்னரும் படத்தைப்பற்றி சிந்தித்து அசை போட வைத்த ஒரு படம். ரொம்ப சீரியசான ஒரு படம் என்று நினைக்க வேண்டாம். அதிகம் அலட்டிக்கொள்ளாத அருமையான ஒரு படம்.

சார்லிஸ் ஏஞ்சல்ஸில் ஒருவரான Drew Barrrymore-ம் Adam Sandler -ம் நடித்துள்ளனர். கதை முழுவதும் ஹாவாய் தீவில் நடப்பதாக அமைக்கப்பட்டிருக்கிறது. படத்தின் ஒளிப்பதிவாளரை எப்படி பாராட்டுவது?

படத்தின் நாயகி ஒரு விபத்தினால் மூளையில் அடிபட்டு Short term memory loss என்னும் வியாதியால் பாதிக்கப்பட்டவள். விபத்துக்கு பின்பு நடக்கும் அத்தனை சம்பவங்களும் தினமும் அவள் தூங்கி எழுந்தவுடன் மறந்துவிடும்.

ஒரு நாள் நாயகியை ஒரு உணவகத்தில் சந்திக்க நேரும்போது நாயகன் அவள் மீது ஈர்க்கப்பட்டு தினமும் சந்திக்க நேர்ந்து, நாயகியின் தந்தை மற்றும் அண்ணனின் மூலம் அவளது வியாதி பற்றிய உண்மையை அறிய நேர்கிறது. அறிந்த பின் நாயகியின் மீது இன்னும் ஈர்ப்பு கூடுகிறது.

அதன் பின் தினமும் நாயகனும் நாயகியும் சந்திக்கும் சம்பவங்கள் மிகவும் சுவையாக அமைக்கப் பட்டிருக்கிறன. படத்தில் நடித்திருப்பவர்கள் அனைவரது கதாபாத்திரங்களும் மனதில் பதியும் படி அமைக்கப்பட்டிருக்கிறன.

படம் பார்த்தவுடம் இந்த படம் தமிழில் ரீமேக் செய்யப்பட்டால் எப்படி இருக்கும் என்பது பற்றி பேசிக்கொண்டு இருந்தோம். உரையாடல் சுவையாக இருந்தது.

கிடைத்தால் கண்டிப்பாக பாருங்கள்.

சிவகாசியும்... விகடன் விமர்சனமும்..

2005-11-11T20:21:00.000Z

நேற்று தான் சிவகாசி படம் பார்த்தேன். இன்று விகடன் விமர்சனம் பார்க்க நேர்ந்தது.. விகடன் பார்த்தவுடன் ஏற்பட்ட முதல் அதிர்ச்சி... சிவகாசி படத்திற்கு 42 மதிப்பெண்கள். சத்தியமாக நம்ப முடியவில்லை.

இவ்வளவு நாள் விகடன் விமர்சனத்தை பார்த்த பின் படம் பார்க்கும் பெரும்பாலானவர்களில் ஒருவனாக இருந்தேன்.. சிவகாசி படத்திற்கு கொடுக்கப்பட்ட மதிப்பெண்களைப்பார்க்கும்போது விகடனின் நம்பகத்தன்மையை சந்தேகிக்கும் நிலைமை உண்டானது..

என் அனுபவத்தில் சிவகாசி அப்படி ஒரு மகா மட்டமான படம்... இந்த படம் மட்டும் நன்றாக ஓடிவிட்டால் அவ்வளவுதான்...இதே போல் 'தென்காசி' 'வடகாசி' என்று வரிசையாக பத்து படங்கள் வருவது உறுதி.

இந்த படத்தை பற்றி விரிவாக எழுதி உங்களின் நேரத்தை வீணடிக்க விரும்பவில்லை. உங்களின் சகிப்புத்தன்மையின் எல்லை எவ்வளவு தூரம் என்று தெரியவேண்டும் என்று பார்க்கவேண்டுமானால் ஒரு முறை இந்த படத்தை கண்டிப்பாக பாருங்கள்.

நான் சொல்லி கேட்கவா போறீங்க... என்னவோ போங்க... யாம் பெற்ற இன்பம் பெறுக இவ்வையகம் !!!

அப்பா!! தமிழ்மணம் பாத்து எவ்வளவு நாளாச்சு?

2005-11-07T23:00:00.000Z

நட்சத்திர வாரத்தை அடுத்து, அலுவலக புதிய வேலைப்பளு, தீபாவளிக் கொண்டாட்டம், ஒரு வாரம் பாரிஸ் விடுமுறைப் பயணம் என்று இரண்டு வாரங்கள் எப்படி போனது என்றே தெரியவில்லை. எதையோ தவற விட்டுவிட்டது போல ஒரு உணர்வு இருந்து கொண்டே இருந்தது தான் உண்மை.

பாரிஸ் பயணம் பற்றி நிறைய எழுத வேண்டும்....ஆஹா!! எவ்வளவு அருமையான ஊர்...பார்த்து பார்த்து செதுக்கியிருக்கிறார்கள். பயணக்களைப்பு.. அப்புறம் நிறைய எழுதுகிறேன்.. இப்போது.. சில புகைப்படங்கள்.

Louvre ஓவியக்கூடத்தின் முன்பு,

ஈஃபில் டவரின் சில காட்சிகள்,

மைக்கெல் ஏஞ்சலோவின் ஒரு சிற்பம்,

Louvre ஓவியக்கூடத்தின் மேற்கூரை,

லியார்னோ டாவின்சியின் மற்றுமொரு ஓவியம்,

Louvre ஓவியக்கூடத்திற்கு எதிரில் ஒரு காட்சி,

பாரிஸின் புறநகரிலிலுள்ள ஒரு சர்ச்,

டிஸ்னிலாண்டில் சில காட்சிகள்,

வானுயர்ந்த கட்டிடங்கள்,

மனதைக் கவர்ந்த சில காட்சிகள்,

நட்சத்திர வாரத்திற்கு நன்றி...

2005-10-23T22:32:00.000+01:00

நட்சத்திர வாரத்திற்கு வாய்ப்பு கொடுத்த மதிக்கு மற்றும் பார்த்து படித்த மற்றும் பின்னூட்டமிட்டு ஆதரவளித்த அனைவருக்கும் நன்றி.

கடந்த வாரத்தில் குறிப்பிடத்தக்கவை.

1) ஐம்பதாவது பதிவு
2) பத்தாயிரமாவது பார்வையாளர்.
3) பிறந்த நாள் வாழ்த்துக்கு நமது ஜனாதிபதியிடமிருந்து நன்றி கடிதம்..
4) கடுமையான வேலைப்பளுவுக்கு இடையிலும் இந்த ஒரு வாரத்தில் ஒன்பது பதிவுகள், ஆயிரத்து ஐநூறு பார்வைகள்.

இந்த வாரத்தில் வெளிவந்த சக வலைப்பதிவாளர்களின் அனைத்துபதிவுகளையும் படிக்கமுடியவில்லை. அவை அனைத்தையும் இந்த வாரத்தில் படிப்பதாக உத்தேசம்.

தங்கர் மற்றும் குஷ்பு வாரங்களுக்கு பிறகு இந்த வாரம் தமிழ்மணத்தில் சூடான தலைப்பாக தமிழ்மணத்தில் காசி அவர்கள் எடுத்த சில நடவடிக்கைகள் பற்றிய பதிவுகள் இருந்தன. என்னைப்போறுத்தவரை தமிழ்மணம் எனக்கு தமிழில் எழுதுவதற்கு ஊன்றுகோலாக இருந்த ஒரு தளம். அதற்கு வாய்ப்பு ஏற்படுத்திக்கொடுத்த காசி அவர்களுக்கு கண்டிப்பாக நன்றிக்கடன் பட்டிருக்கிறேன்...

சில மத சார்பான விரோத மனப்பான்மையை தூண்டும் சில பதிவுகளைப்படிக்கும்போது இவையெல்லாம் எந்த அளவுக்கு விரோத மனப்பான்மையை தூண்டுவதாக இருக்கின்றன என்று வருத்தமாக இருந்தது. இவற்றையெல்லாம் தமிழ்மணத்தில் தடை செய்யக்கூடாதா? என்று ஆதங்கமாக இருந்தது உண்மை. ஆனால் ஒரு நடவடிக்கையை நல்ல நோக்கத்தில் எடுக்கும்போது எந்த அளவுக்கு எதிர்ப்புகளை சந்திக்க வேண்டியிருக்கும் என்று கடந்த வாரத்தில் கற்றுக்கொள்ள வேண்டியிருந்தது.

இணையக் குசும்பன் மற்றும் சின்னவன் இருவரின் பதிவுகள் நீக்கப்பட்டது கொஞ்சம் ஆச்சரியமாக இருந்தது உண்மை. தமிழ்மணத்தின் சட்ட திட்டங்களுக்கு கட்டுப்பட்டுத்தான் இதில் சேர்ந்தோம் என்பது உண்மையான வாதமாக இருந்தாலும் அனைவரும் காசியின் முடிவுக்கு எதிராக கருத்துக்களை சொல்வது என்பது எதற்காக என்று பார்த்தால், தமிழ்மணம் பெரும்பாலும் ஒரு நிறுவனத்துக்கு மேலாக, ஒரு குடும்பமாகவே பார்க்கப்பட்டதால் தான்.

இது பற்றிய அனைவரின் கருத்துக்களையும் படித்தபின் காசி அவர்கள் அவரது கருத்துக்களை தெரிவிக்கிறேன் என்று கூறியிருக்கிறார். அதுவரை பொறுத்திருத்தல் தான் ஆரோக்கியமான ஒன்றாக இருக்கும்.

மற்றொருமுறை அனைவருக்கும் நன்றி.

லண்டன் சுத்திப் பாக்கலாமா? - பாகம் 1

2005-10-22T10:09:00.000+01:00

இப்போது இந்தியாவிலிருந்து லண்டனுக்கு நிறைய விமான நிறுவனங்கள் சேவையை ஆரம்பித்துள்ளன. சில விமானங்களில், மிகக்குறைந்த கட்டணத்திலேயே லண்டன் வந்து போகலாம். லண்டனில் ஹீத்ரோ, காட்விக், லூடன், லண்டன் நகர் விமான நிலையம் என்று நான்கு விமான நிலையங்கள். ஆனால் இந்தியாவிலிருந்து வரும் விமானங்கள் அனைத்தும் ஹீத்ரோ(Heathrow) விமான நிலையத்திற்கே வருகின்றன. சில விமானங்கள் காட்விக்(Gatwick) விமான நிலையத்துக்கு வருவது உண்டு.

லண்டன் சுற்றிப்பார்க்க வருவதற்கு தகுந்த காலநிலை எதுவென்று கேட்டால் கோடைகாலம் தான். குறிப்பாக ஏப்ரல் மாதத்திலிருந்து ஆகஸ்டு மாதம் வரை காலநிலை நன்றாக இருக்கும். அதிகாலை ஐந்து மணிக்கே சூரியன் உதித்து இரவு பத்து மணிவரை நன்றாக வெளிச்சமாக இருக்கும். அதனால் வருவதற்கான பயணத்தை அப்போது திட்டமிடுவது நல்லது. உடையை பொறுத்தவரை உச்ச கோடைகாலத்தில் நம்மூரில் அணியும் உடையே போதுமானது. ஆனால் உச்ச கோடைகாலத்திற்கு முன்பும் பின்புமான சமயத்தில் அணிவதற்கு குளிர்கால உடைகளை எடுத்துக்கொண்டு வருவது நல்லது.

தங்குவதற்கு நிறைய 'படுக்கை மற்றும் காலையுணவு'(B&B) வசதியுள்ள இடங்கள் குறைந்த விலைக்கே கிடைக்கின்றன. லண்டனின் மையப்பகுதியில் இருக்கும் பெரிய ரயில் நிலையம் 'விக்டோரியா ரயில் நிலையம்'. இதற்கு அருகில் B&B வசதியுள்ள இடங்கள் நிறைய இருக்கின்றன. முன்னரே reserve செய்திருக்காவிட்டாலும் விக்டோரியா ரயில் நிலையத்திற்கு வெளியே சுற்றுலா மையத்திற்கு அருகில் உள்ள counter -களில் உடனே book பண்ணிக்கொள்ளலாம். தோராயமாக ஒருவருக்கு ஒருநாளைக்கு 25 பவுண்டுகள் ஆகும். செலவுக்கென்று ஒரு நாளைக்கு குறைந்தது 75 பவுண்டுகள் என்று வைத்துக்கொள்வது நல்லது. இதில் உணவு, போக்குவரத்து, நுழைவுக்கட்டணங்கள் எல்லாம் அடங்கும்.

லண்டன் நகரத்தில் பாதாள ரயில் போக்குவரத்து போக்குவரத்து மிகவும் பிரபலமானது. 'Tube' என்று இதை சொல்லுவார்கள். இது லண்டன் நகரின் பெரும்பாலான எல்லா இடங்களையும் இணைக்கிறது. எளிதாக புரிந்து கொள்வதற்காக பல்வேறு வர்ணங்களில் ரயில் போக்குவரத்து பாதைகளை குறித்து வைத்திருக்கிறார்கள். புதிதாக வருபவர்கள் கூட எளிதில் பார்த்து புரிந்துகொள்ளக்கூடிய அளவுக்கு நன்றாக எளிமைப்படுத்தியிருக்கிறார்கள். கீழே உள்ள படத்தைப்பாருங்களேன் உங்களுக்கே புரியும்.

நகரில் பெரும்பாலும் எல்லா ரயில் நிலையங்களிலும் சுற்றுலா உதவி மையங்கள் இருக்கும். சுற்றிப்பார்க்க செல்லும்போது, அந்த இடம் எந்த ரயில் நிலையத்திற்கு அருகில் இருக்கிறது என்று குறித்துவைத்துக்கொள்வது நல்லது. அதே போல் அந்த நாளில் எந்தெந்த இடங்கள் பார்க்கப்போகிறோம் என்பதை முன்பே தயார் செய்வது ரயில் பிரயாணத்தில் அதிக நேரத்தை வீணடிக்காமல் இருப்பதை தடுக்கும்.

முதன் முதலாக யாருடன் உதவியுடன் இல்லாமல் செல்பவர்கள் 'The Big Bus' போன்ற திறந்த மேற்புறத்துடன் நேரடி வர்ணனையுடன் கூடிய பேருந்துகளில் பயணம் செய்வது வித்தியாசமான ஒரு அனுபவமாக இருக்கும். லண்டனில் முக்கியமான எல்லா இடங்கள் வழியாகவும் போய்
வருமாறு ஒரு சுற்றுப்பாதை வகுத்திருப்பார்கள். ஒருமுறை அனுமதிச்சீட்டு வாங்கினால் அது 24 மணி நேரத்துக்குள் எந்த இடத்திலும் இறங்கி ஏறிக்கொள்ளலாம். 15 நிமிடங்களுக்கு ஒரு முறை ஒரு பேருந்து வந்து போய்க்கொண்டு இருக்கும். இத்துடன் இலவசமாக ஒரு படகு சவாரிக்கான
அனுமதிச்சீட்டும் தருவார்கள்.

பாஸ்போர்ட் போன்றவற்றை பத்திரமாக வைத்துக்கொள்வது நல்லது. பயப்படும் படியாக இல்லாவிட்டாலும் சில இடங்களில் திருட்டு பயம் உண்டு. பொதுவாகவே எங்கும் வழியில் காவலர்கள் நிறுத்தி பாஸ்போர்டை காட்ட சொல்லுவதில்லை. செலவுக்கு Travellers cheque -ஆக பணத்தை மாற்றி எடுத்துக்கொண்டு வருவது நல்லது. முழுவதுமாக பவுண்டுக்கு மாற்றிவிடாமல் அன்றைய செலவுக்கு எவ்வளவு தேவையோ அவ்வளவு மட்டும் மாற்றி எடுத்துக்கொண்டு வருவது நல்லது.

அடுத்த பதிவுகளில் லண்டனில் எந்தெந்த இடங்கள் முக்கியமாக பார்க்க வேண்டியவை என்பதை பார்க்கலாம். ...

பெங்களூர் மலர்க் கண்காட்சி...

2005-10-21T21:23:00.000+01:00

இவை பெங்களூர் லால் பார்க்கில் வருடா வருடம் நடக்கும் மலர்க் கண்காட்சியின் போது எடுக்கப்பட்டவை.

தேசப்பற்று...

2005-10-20T22:08:00.000+01:00

சில பதிவுகளில் சிலர் 'அயல்நாடுகளில் வசிக்கும் இந்தியர்களுக்கு இந்தியாவை குறை கூற எந்த அருகதையும் இல்லை' என்பது போல் எழுதுவதை படிக்க வருத்தமாக இருக்கிறது.

இந்தியாவில் வசிப்பதால் மட்டுமே அல்லது இந்தியாவை புகழ்ந்து பேசுவதால் மட்டுமே ஒருவர் தேசப்பற்று மிக்க இந்தியர் ஆகிவிடமுடியாது. தேசப்பற்று என்பது உணர்வு பூர்வமான ஒன்று. அது எங்கிருந்தாலும் எங்கு வசித்தாலும் மாறாத ஒன்று. குடும்பத்தில் இருக்கும் தவறுகளை குடும்பத்தவரிடம் சுட்டிக்காட்டுவதில் எந்த தவறும் இல்லை. அதையே போய் பக்கத்துவீட்டவரிடம் நக்கலாக கூறினால் அதை தவறு என்று ஒத்துக்கொள்கிறேன். எனக்குத்தெரிந்து யாரும் அப்படி செய்வதில்லை.

இந்தியா வாழ்க, இந்தியா வாழ்க என்று கூக்குரலிடுவதால் மட்டுமே நமது நாடு முன்னேறிவிடாது. இந்தியாவின் முன்னேற்றத்துக்கு தேவையானது நல்ல ஒரு direction... அந்த திசையை நோக்கி அனைவரின் ஒட்டுமொத்த கடின உழைப்புப் பயணம். அதற்கு வளர்ந்த, வளரும் பக்கத்து நாட்டவர்களுடன் நம்மை சரி பார்த்துக்கொள்ள வேண்டிய தேவை கட்டாயம் இருக்கிறது. உலமயமாக்கப்பட்ட இந்த சூழ்நிலையில் அங்கிருக்கும் சில நல்ல விஷயங்களை எடுத்துக்கொள்ள வேண்டியது அவசியமாக இருக்கிறது.

ஒரு நாட்டின் வளர்ச்சி எங்கிருந்து தொடங்குகிறது என்றால் அது அதன் குறைகளை உணரத்தொடங்குவதிலிருந்தே. நாம் எங்கிருக்கிறோம் என்று தெரிந்தால் தான் அங்கிருந்து அடுத்த நிலையை அடைய முடியும். அதை வெவ்வேறு நாடுகளிலில் வசிக்கும் இந்தியர்கள் நல்ல கெட்ட விஷயங்களை, அவரவரது கண்ணோட்டத்தை ஆராய்ந்து அதை நமக்குள் பொதுவான அமைப்பான வலைப்பதிவில் வெளியிடுவது ஆக்கபூர்வமான ஒன்றே தவிர வேறெதுவுமில்லை.

தயவு செய்து நாட்டுப்பற்றுக்கு இது போன்ற அளவு கோல்களை வைக்காதீர்கள். அடுத்தவரின் தேசப்பற்றை தயவுசெய்து சந்தேகிக்காதீர்கள். தவறு செய்யும் தனிமனிதரை தயவுசெய்து கண்ணியமாக கண்டியுங்கள். தனி மனிதரின் கருத்துக்களை பொதுமைப்படுத்தி எல்லோரும் இப்படித்தான் என்ற முடிவுக்கு வரவேண்டாம்.

அருமை x அருகாமை

2005-10-19T19:51:00.000+01:00

பக்கத்தில் இருந்தால் பலவற்றின் அருமை தெரிவதில்லை. யோசித்துப்பார்த்தால், மதுரையில் பதினைந்து வருடங்களுக்கு மேல் வசித்திருக்கிறோம்...சொன்னால் நம்ப மாட்டீர்கள் இது வரைக்கும் மீனாட்சி அம்மன் கோயிலுக்குள் போனதில்லை. நேற்று என் அலுவலகத்தில் புதிதாக சேர்ந்த நண்பர் இந்தியாவில் எந்த இடம்? என்றபோது மதுரை என்றேன். கேட்டவுடன் அவர் முகத்தில் ஒரு பிரகாசம்.. 'மினாக்ஷி டெம்ப்பிள்' என்று மகிழ்ச்சி பொங்கக் கூறி அவர் அங்கு போயிருந்தபோது ஏற்பட்ட அனுபவங்களை விவரிக்க தொடங்கினார்... அப்போது தான் நெஞ்சில் சுருக் என்று உறைத்தது.

சொந்த ஊருக்கு அருகில் இருக்கும் 'சித்தன்ன வாசல்' குகை ஓவியங்களின் அருமையும், பள்ளியில் அவை பற்றி படித்திருந்தாலும் போகவேண்டுமென்று தோன்றவில்லை. கூகிள் எர்த்தில் பார்த்தவுடன் தான் இராமேஸ்வரம் இருக்கும் அழகு பொங்கும் இடமும் அதன் அருமையும்
தெரியவருகிறது. இத்தனைக்கும் என் சொந்த ஊரிலிருந்து இரண்டு மணி நேர பிரயாண தூரத்தில்.

ஆனால் கல்லூரி நாட்களில் மட்டும் தஞ்சை பெரிய கோயிலுக்கு தவறாமல் ஒவ்வொரு வெள்ளிக்கிழமையும் ஆஜராகிவிடுவது உண்டு.. ஆனால் அது வேறொரு காரணத்துக்காக..... வேறொன்றுமில்லை. ஒவ்வொரு வெள்ளிக்கிழமையும் பெரிய கோயிலில் இசை அல்லது நாட்டிய நிகழ்ச்சி நடப்பதை பார்ப்பதற்கு... :-)

அதே போல் தான் அம்மாவும், அம்மாவுடன் கூடவே இருக்கும் வரை அவரின் அருமை தெரியவில்லை. முதன் முதலாக கல்லூரிப்படிப்புக்காக வெளியே வந்தவுடன் தான் அவருடைய அருமை புரிந்தது. ஒரு வயதில் எப்போது பார்த்தாலும் எரிந்து விழுவது.. எதற்கெடுத்தாலும் ஒரு கோபம் என்று அம்மா எது சொன்னாலும் எதிர்த்துப்பேசிக்கொண்டிருந்தது எவ்வளவு தப்பென்று விட்டு விட்டு தூரத்தில் இருக்கும் போது தான் புரிந்தது. அதுவே அவர் பக்கத்தில் எப்போதும் இருக்கும் சூழ்நிலையில் இருந்திருந்தால் இந்த உணர்தல் சாத்தியப்பட்டிருக்குமா என்று தெரியவில்லை.

பக்கத்திலிருக்கும்போதெல்லாம் தினமும் ஒரு முறையாவது சண்டை போட்டுக்கொள்ளும் மனைவியின் அருமையும் அவரது அண்ணனின் திருமணத்திற்காக தனியாக ஊருக்கு போயிருக்கும்போது தான் தெரிந்தது. அக்கா, தம்பி, உறவினர் மற்றும் நண்பர்கள் அனைவரின் அருமையும் அப்படித்தான்.

அதேபோல் தான் அயல்நாட்டிற்கு வந்தபின் தான் சொந்த நாட்டின் அருமை புரிகிறது. சொர்க்கமே என்றாலும் அது நம்மூர போல வருமா என்று சித்தப்பா ராமராஜன் போல் பாடத்தோன்றுகிறது. இந்தியாவில் இருக்கும் வரை கார்கில் போர், பாகிஸ்தானுடன் கிரிக்கெட் விளையாட்டு, சுதந்திர, குடியரசு தினங்களின் போது மட்டும் பெரும்பாலும் பொங்கியெழும் தேசப்பற்று இங்கு அயல்நாட்டில் தினமும் ஒருமுறையாவது இந்தியன் என்று அறியப்படுவதால் எப்போதும் நெஞ்சில் நிறைந்திருக்கிறது.

இப்பவாவது அருமை தெரிந்ததே.. அதுவரைக்கும் நல்லது என்கிறீர்களா?... அதுவும் சரிதான். இந்த முறை ஊருக்கு போகும்போது பார்க்கவேண்டிய இடங்கள், கோயில்கள் மற்றும் அன்பு செய்ய வேண்டிய சொந்தங்கள் என்று போட்ட பட்டியல் கொஞ்சம் நீளமாகவே இருக்கிறது.

மனதுடன் ஒரு போராட்டம்...

2005-10-18T14:26:00.000+01:00

மனது ஏன் இப்படி படபடக்கிறது. ஒரு செயலை செய்யும்போது அதில் கவனமில்லாமல் வேறு எதற்கோ ஏன் சிந்தனை செல்கிறது. ஒருவேலையை செய்யலாம் என்னும்போது மனதின் மறுபுறம் வேறு வேலையை செய்ய ஆசைப்படுகிறதே !!. அப்போது மனம் என்பது ஒன்றுதானா அல்லது ஒன்றுக்கு மேலா? எப்போதும் ஒரு பரபரப்பு. எதையோ பிடிக்க ஓடுவது போல் ஒரு நிலையின்மை. அப்போது அந்த கணத்தை அனுபவிக்க முடியாமல் தவிப்பு.

எது வேண்டுமென்று தெரியவில்லை. எதுமுக்கியம் என்று தெரியவில்லை. எது நல்லதென்று புத்திக்கு ஒருவேளை தெரிந்தாலும் அதை செயல்படுத்த முயலும் போது ஏதோ ஒன்று வந்து அதை செய்வதை தடுக்கிறது... தடுக்கும் அது எதுவென்று உற்று நோக்கினால் அதுவும் நம் மனதிலிருந்து தான் புறப்படுகிறது என்று புலப்படுகிறது. இப்போது இவை இரண்டையும் உற்று நோக்கும் இந்த சிந்தனை எதுவென்ற கேள்வி வருகிறது. கேள்விகள் மேல் கேள்வி கேட்டு, கிடைக்கும் பதிலின் மீதும் கேள்வி கேட்டு முடிவில்லாத தொடர் சிந்தனையில் செய்ய வேண்டிய வேலையை விட்டு எங்கோ போய் தூரத்தில் நிற்கிறது மனம். சுதாரித்துக்கொண்டு மீண்டு வருவதற்குள் எந்த இடத்தில் விட்டோம் என்பது மறந்து போய், திருவிழாவில் தொலைந்து போன குழந்தைபோல் முழிக்கிறது.

மனதின் ஒருபுறத்துடன் மறுபுறம் போராடி போராடி பின்பு அவை இரண்டும் எதிரிகள் இல்லை என்ற தெளிவு வந்து சரி ஒன்றை ஒன்று புரிந்து கொள்ள வைக்க முயற்சிக்கலாம் என்ற ஆசை வருகிறது. அதற்கு ஏதுவாக தளம் ஏற்படுத்திக்கொடுப்பது அவசியமாகிறது.

அமைதியான சூழலில் அமர்ந்து கண்களை மூடிக்கொண்டு மனதின் சிந்தனையோட்டத்தை, அது போகும் திசையை தனித்து நின்று உற்று நோக்கினால் மனம் ஓடி ஓடி களைத்துப்போய் எங்கோ போய் நின்று விடுகிறது...அப்போது கிடைக்கும் அமைதி அப்போது கிடைக்கும் தெளிவு இதுவரை அனுபவித்திராத மற்றும் வார்த்தைகளால் விவரிக்க இயலாத ஒன்றாக இருக்கிறது. அப்போது கண்களை திறந்து உலகத்தை திறந்து பார்த்தால் அந்த அனுபவமே புதிதாக இருக்கிறது. அந்த அமைதி போருக்குப்பின் அமைதி என்பார்களே அது போல் மனப்போருக்கு பின் ஏற்படும் அமைதி.

இந்த அமைதியை யாரேனும் எப்போதேனும் உணர்ந்திருக்கிறீர்களா?

சிறுவயது விளையாட்டுக்கள்.

2005-10-17T22:38:00.000+01:00

இப்போதுள்ள சிறுவர்களுக்கு விளையாடக்கிடைக்கும் X-BOX, Playstation, GameBoy இவற்றையெல்லாம் பார்த்தால் ஆச்சரியமாக இருக்கிறது. அந்த நவீன விளையாட்டு சாதனங்களை இந்தத் தலைமுறை சிறுவர்கள் கையாளும் லாவகம் பிரமிக்க வைக்கிறது. அதே போல் நமது சிறுவயதில் நமக்கு நமது சிறு வயதில் என்ன விளையாடக்கிடைத்தது என்றும் ஆதங்கப்படவும் வைக்கிறது.

கொஞ்சம் நினைவுகளை பின்னோக்கி சுழல விட்டுப்பார்த்தால் எனக்கு விவரம் தெரிந்து விளையாடிய விளையாட்டுகள்...

முதலில் நினைவுக்கு வருவது ஒளிந்து பிடித்து விளையாடுதல். இதற்கு 'சாட் பூட் த்ரீ' என்று சொல்லி ஓவ்வொருவராக விலக்கிவிட்டு கடைசியில் யார் இருக்கிறார்களோ அவர்கள் ஒன்றிலிருந்து பத்துவரை கண்ணை மூடிக்கொண்டு எண்ணவேண்டும். அதற்குள் மற்றவர்கள் ஒளிந்து கொள்ளவேண்டும். பின்பு ஒளிந்து கொண்டவர்களை ஒவ்வொருவராக கண்டு பிடிக்க வேண்டும். ஒளிந்திருப்பவரை ஒவ்வொருவராக கண்டு பிடித்தவுடன் 'ஒன்னீஸ்' 'ரெண்டீஸ்' :-) என்று சொல்லுவார்கள். இந்த விளையாட்டின் பெயரே ஒன்னீஸ் ரெண்டீஸ் என்று சொல்லுவது உண்டு. அனைவரும் கண்டு பிடிக்கப்பட்ட பின் முதன் முதலில் கண்டுபிடிக்கப்பட்டவர் பின்பு தொடர வேண்டும். இப்படி போய்கொண்டே இருக்கும்

ஆண்களுக்கு பம்பர விளையாட்டு மிகவும் பிரசித்தமானது, 1,2,3 சொல்லிவிட்டு எல்லோரும் ஒரே சமயத்தில் பம்பரத்தை சுழலவிட்டுவிட்டு சாட்டையால் சுற்றி கையில் எடுக்க வேண்டும். யார் கடைசில் எடுக்கிறார்களோ அவர்களது பம்பரத்தை மண் தரையில் ஒரு வட்டம் போட்டுவிட்டு அதன் உள்ளே இடுவார்கள். அப்புறம் ஒவ்வொருவராக பம்பரத்தை வேகமாக சுழற்றி முதலில் அந்த வட்டத்துக்குள் குத்துமாறு சுழலவிடவேண்டும். வட்டத்துக்குள் குத்தாவிட்டால் அவரது பம்பரமும் வட்டத்துக்குள் வைக்கப்படும். இது ஒரு சுவாரசியமான ஆட்டம். ஆட்டத்தின் முடிவில் தோற்பவரின் பம்பரத்தின் மேல் வெற்றி பெற்றவர்கள் அனைவரும் ஒரு 'ஆக்கர்'(பம்பரத்தின் மேல் ஆணியை வைத்து புள்ளி விழுமாறு ஓங்கி அடிப்பார்கள்) வைப்பார்கள். சில சமயங்களில் பம்பரம் உடைவது கூட உண்டு. சிலசமயம் பெண்களை கவர, பம்பரத்தை சுழற்றி தரையில் படாமலே கையில் எடுப்பதுவும் உண்டு.

கோலி விளையாட்டு பல விதங்களில் விளையாடப்படும். சுவற்றின் ஓரத்தில் ஒரு சதுரமாக ஒரு கோடு போட்டுவிட்டு அதற்குள் சில கோலிகளை உருட்டுவார்கள். அதற்குப்பிறகு எதிராளி சொல்லும் கோலியை எறிந்து அடிக்க வேண்டும். இதற்கு சிகரெட் அட்டை, கோலி குண்டு இவற்றை பணயமாக வைத்து ஆடுவது உண்டு. கோலிகுண்டு சிலசமயம் சிலர் பணம் வைத்து ஆடுவதால், வீட்டார்கள் அதை பெரும்பாலும் விளையாட அனுமதிப்பதில்லை.

கிட்டிப்புல்(கில்லி) எங்கள் பகுதிகளில் மிகவும் பிரபலமான ஆட்டம். ஆனால் பல இடங்களில் இதை விளையாடவிட மாட்டார்கள். எனக்கு தெரிந்து நிறைய பேருக்கு கில்லி விளையாட்டால் காயம் ஏற்பட்டிருக்கிறது. ஆட்டம் மிகவும் சுவாரசியமானது. தரையில் நீளவாக்கில் தோண்டிவிட்டு கிட்டிப்புல்லை அதற்கு குறுக்கில் வைக்க வேண்டும், பிறகு கையில் இருக்கும் கோலால் , கிட்டிப்புல்லை வேகமாக அழுத்தம் கொடுத்து நெம்பித் தள்ள வேண்டும். எதிராளிகள் அந்தப்புறம் நின்று கொண்டு இருப்பார்கள். அவர்கள் இதை கீழே விழாமல் பிடித்துவிட்டால் நீங்கள் அவுட்.. பின்பு அவர்கள் முறை. பிடிக்காமல் தூரத்தில் போய் விழுந்தால், நீங்கள் கோலை குறுக்காக வைக்கவேண்டும் .பின்பு அவர்கள் கிட்டிபுல்லை தூக்கி குறி பார்த்து எறிந்து அது கோலில் பட்டால் நீங்கள் அவுட். அவர்கள் எறியும் போது அது கோலில் படாமல் தூரத்தில் போய் விழுந்தால் நீங்கள் ஆட்டத்தை தொடரலாம்.

ஆட்டம் எப்படியென்றால், நீங்கள் கிட்டிப்புல்லின் சீவியிருக்கும் ஒரு முனையில் அடிக்க வேண்டும், அது எம்பி வரும்போது அதை கோலால் எத்தனை முறை தட்ட முடியுமோ அவ்வளவு புள்ளிகள். அப்படி தட்டிக்கொண்டே குழியிலிருந்து எவ்வளவு தூரம் கொண்டு செல்ல முடியுமோ அவ்வளவு தூரம் கொண்டு செல்ல வேண்டும். ஒரு முறை கூட தட்ட முடியாவிட்டால் அங்கிருந்து குழி இருக்கும் தூரத்தை கையிலிருக்கும் கோலால் அளக்க வேண்டும் எவ்வளவு தூரம் இருக்கிறதோ அவ்வளவு புள்ளிகள். இப்படியே நீங்கள் அவுட் ஆகும் வரை ஆட்டம் தொடரும். ஒரு தெருவில் ஆடும் ஆட்டம் அப்படியே பக்கத்து தெருவிற்கும் போவது உண்டு.

பள்ளியில் இடைவேளைகளில், சோளத்தட்டையால் எறி பந்து விளையாடுவது உண்டு. வகுப்பறையில் போரடித்தால் ரஃப் நோட்டுப்புத்தகத்தில் கட்டம் போட்டு விளையாடுதல் ரொம்ப பிரபலம். அதே போல் நீளமான குச்சியை வைத்துக்கொண்டே விளையாடும் கரண்ட் ஷாக், புளியங்கொட்டையை ஒரு வட்டத்திற்குள் கொட்டிவிட்டு அதை தட்டையான கல்லால் செதுக்கி வெளியே கொண்டு வந்து விளையாடும் 'செதுக்கு சில்' ரொம்ப பிரபலம். அதே போல் ஊருக்கு ஒதுக்குப்புறத்திற்கு சென்று மாஞ்சா தடவி பட்டம் விடுதல் ரொம்ப பிரபலம்.

பெண்களெல்லாம் கண்கட்டு விளையாட்டு, பரமபதம், நொண்டி , சொட்டாங்கல்( இது மிகவும் பிரபலமான விளையாட்டு), பல்லாங்குழி இவையெல்லாம் விளையாடுவது உண்டு. நல்ல மணல் விளையாடக்கிடைத்தால் மணலை நீளவாக்கில் குவித்துவிட்டு எதிரெதிராக உட்கார்ந்து கொண்டு சிறு கல்லை அதற்குள் ஒளித்து வைத்து எதிரில் இருப்பவர் அது எங்கிருக்கிறது என்பதி அனுமானித்து அதன் மேல் இருகைகளை வைத்து மூடவேண்டும். சரியாக கணித்தால் பின்பு அடுத்தவர் முறை. இந்த விளையாட்டின் பெயர் மறந்துவிட்டது.

அதற்குப்பிறகு தூர்தர்ஷன் புண்ணியத்தில் கிரிக்கெட் பிரபலமான பின்பு பெருப்பாலானோர் அதற்கு தாவி விட்டனர். அந்தந்த தெருவில் உள்ள சிறுவர்கள் அனைவரும் இனைந்து ஒரு டீம் ஆரம்பித்து எல்லோரும் பணம் போட்டு கிரிக்கெட் விளையாட்டுக்கு தேவையான் பொருள்கள் வாங்கி பக்கத்து தெருவில் இருக்கும் டீமுடன் போட்டிக்கு போவது உண்டு. சிலசமயம் பெரிய டோர்னமென்ட் எல்லாம் நடத்துவது உண்டு. முதல் பரிசு இரண்டாம் பரிசு எல்லாம் அந்த வட்டாரத்தில் இருக்கும் எம்.எல்.ஏ அல்லது கவுன்சிலர் கொடுப்பார். அதற்கு கைமாறாக சுவரொட்டி அடித்து பரிசு உபயம் என்று அவர்கள் பெயரை வெளியிடுவது உண்டு. கிரிக்கெட் விளையாடும்போது எவ்வளவோ கண்ணாடிகளை உடைத்திருக்கிறோம். கார்க் பந்தில் கால் தடுப்பு கூட இல்லாமல் வேகப்பந்து வீச்சை தைரியமாக எதிர்கொள்ளும் தைரியத்தை இப்போது நினைத்தால் ஆச்சரியமாக இருக்கிறது.

அப்போதெல்லாம் மதுரை மருத்துவக்கல்லூரி மைதானத்துக்கு விடுமுறை நாளில் போகும்போது குறுக்கும் நெறுக்குமாக எத்தனையோ குழுக்கள் கிரிக்கெட் ஆடிக்கொண்டு இருக்கும். கிரிக்கெட் மைதானத்துக்கு அவ்வளவு பஞ்சம். மைதானங்களின் பஞ்சத்தால் குறுகலான தெருக்களில் ரப்பர்
பந்துகளில் ஒன் பிட்ச் கிரிக்கெட் ஆடுவது பிரபலமாகிவிட்டது. கிரிக்கெட் பிரபலனானதால் அழிந்து போன சிறுவயது விளையாட்டுக்கள் எவ்வளவோ.

மேலே சொல்லாமல் விடுபட்டுப்போன எவ்வளவோ விளையாட்டுக்கள் இருக்கின்றன. இப்போது இருக்கும் சிறுவர்களுக்கு இவைபற்றியெல்லாம் எந்த அளவுக்கு தெரிந்திருக்கும் என்று தெரியவில்லை. கிராமங்களில் இவை இன்னும் உயிருடன் இருக்கின்றன என்று நம்புகிறேன். ஆனால் ஒன்று மட்டும் உண்மை இதை பற்றி எழுதும்போதே மனதுக்குள் மெல்லிதான ஒரு ஆனந்தம் பரவுவதை உணர முடிகிறது...

ஜனாதிபதியிடமிருந்து நன்றிக் கடிதம்...

2005-10-17T13:27:00.000+01:00

காசி அவர்கள் அவரது பதிவில் நமது ஜனாதிபதிக்கு அனுப்பிய கடிதத்திற்கு அவர் பதில் அனுப்பவில்லை என்பதை சுட்டிக்காட்டியிருந்தார். எனக்கும் அதே அனுபவம் தான் இருந்தது.

கடந்த வாரம் நமது தமிழ் வலைப்பதிவர் சார்பாக ஜனாதிபதிக்கு பிறந்த நாள் வாழ்த்து தெரிவித்திருந்தேன் இப்போது மின்னஞ்சலை திறந்து பார்த்தால் ஜனாதிபதியிடமிருந்து நன்றி தெரிவித்து ஒரு மின்னஞ்சல். ரொம்பவே மகிழ்ச்சியாக இருக்கிறது. இதோ அதன் பிரதி உங்களுக்காக.

நட்சத்திரமா !!! நானா ???

2005-10-17T04:40:00.000+01:00

உண்மையிலேயே பயமாகத்தான் இருக்கிறது. திடீரென்று மதி அவர்கள் அக்டோபர் மாதம் ஏதாவது ஒரு வாரத்திற்கு நட்சத்திரமாக இருக்க முடியுமா என்று கேட்டார்கள். ஏதோ ஒரு தைரியத்தில் ஒப்புக்கொண்டு விட்டேன். தருமி, டொண்டு போன்ற பழம் தின்று கொட்டை போட்ட பெரியவர்கள் நட்சத்திரமாக இருந்த வாரங்களுக்கு அடுத்தவாரம் என்று நினைக்கும்போது கொஞ்சம் கை நடுங்குகிறது.

பள்ளிப்படிப்பு படிக்கும்போதே எழுத்தில் ஆர்வம் இருந்ததாக ஞாபகம். சிறுவயதில் 'பாரதி' என்ற கையெழுத்துப்பத்திரிக்கை நடத்தினேன். வெறும் மூன்று பிரதிகள் மட்டும் வெளியிட்டு நிறுத்திவிட்டேன் (குமுதம் ஆனந்த விகடன் போன்ற பத்திரிக்கைகளின் போட்டியால்.. :-) கல்லூரி நாட்களில் அவ்வப்போது டயரியில் கிறுக்குவது உண்டு. அவ்வளவுதான் எழுத்துக்கும் எனக்கும் உள்ள தொடர்பு. ஆனால் நிறைய படிப்பது உண்டு. எழுத்தாளர் பாலகுமாரனின் பரம விசிறி. அவருடைய அனைத்து புத்தகங்களையும் படித்திருக்கிறேன். கடந்த ஒருவருடமாக அலுவலகத்தில் வேலை நெருக்கடி அவ்வளவாக இல்லாததால் எதுடா படிக்கக்கிடைக்கும் என்று ஏங்கியது உண்டு. கூகிள்-->தமிழோவியம்--> கிரிக்கெட்-->பத்ரியின் வலைப்பதிவு-->தமிழ்மணம் என்று தமிழ்மணத்தை முதன் முதலில் நுகர நேர்ந்தது. முதல் சில மாதங்கள் படித்தல் மற்றும் பிரதிபலித்தல் என்றே இருந்துவிட்டேன். ஒருநாள் தைரியம் வந்து சொந்தமாக ஒரு வலைப்பதிவு ஆரம்பித்து எழுத ஆரம்பித்தேன். எழுத ஆரம்பித்தவுடன் அதற்கு கிடைத்த வரவேற்பு மேலும் மேலும் உற்சாகத்தை கொடுத்தது.

எழுத ஆரம்பித்தவுடன் மறக்கமுடியாதது..

ஒரு நாள் எழுத்தாளர் மாலனிடமிருந்து ஒரு மின்னஞ்சல். நான் எழுதிய லண்டனில் குண்டுவெடிப்பு பற்றிய கட்டுரையை 'திசைகளில்' வெளியிடலாமா? என்று..... தலை கால் புரியவில்லை. அட நமது எழுத்துக்கும் அங்கீகாரம் கிடைக்கிறதே என்று ஒரே மகிழ்ச்சி. முதன் முதலில் அதை திசைகளில் பார்த்தபோது அடைந்த மகிழ்ச்சியை விவரிக்க இயலாது. நண்பர்கள், உறவினர்கள் எல்லாருக்கும் சுட்டியை அனுப்பினேன். அப்போது தான் யாரோ ஒரு பெரியவர் 'நாம் எல்லாம் அங்கீகாரத்துக்கு ஏங்கும் பிச்சைக்காரர்கள்' என்று சொன்னதை உணர முடிந்தது.

சும்மாவே நான் தமிழ்மணம்-holic.. அலுவலகத்தில் எப்போதெல்லாம் ஓய்வு கிடைக்கிறதோ அப்போதெல்லாம் தமிழ்மணத்திற்கு வந்து தலையை காட்டி விட்டுபோவது உண்டு. இந்தவாரம் தொடர்ந்து தினமும் எழுத வேண்டும் இல்லையா? அலுவலகத்தில் வேலை செய்தாற் போல் தான்... இது வரை இந்தவாரம் முழுவதும் என்ன எழுதுவது என்று திட்டமிடவில்லை.
முடிந்தவரை எழுதுகிறேன். தயவுசெய்து அவ்வப்போது வந்து எட்டிப்பார்த்து முடிந்தால் முதுகில் தட்டிவிட்டோ அல்லது தலையில் கொட்டிவிட்டோ போங்கள்.

ஜனாதிபதிக்கு பிறந்த நாள் நல்வாழ்த்துக்கள்...

2005-10-14T11:05:00.000+01:00

நாளை (15/10/2005) பிறந்தநாள் காணும் நமது ஜனாதிபதிக்கு நமது வலைப்பதிவு நண்பர்கள் சார்பாக பிறந்த நாள் நல்வாழ்த்துக்கள்.

இலட்சிய சிகரம்

நான் ஏறிக்கொண்டே இருக்கிறேன்,
எங்கு இருக்கிறது இலட்சிய சிகரம், என் இறைவா?

நான் தோண்டிக்கொண்டே இருக்கிறேன்,
எங்கு இருக்கிறது அறிவுப் புதையல், என் இறைவா?

நான் பெருங்கடலில் நீந்திக் கொண்டே இருக்கிறேன்,
எங்கு இருக்கிறது அமைதித் தீவு, என் இறைவா?

இறைவா, நூறு கோடி மக்கள்
இலட்சிய சிகரத்தையும், அறிவுப் புதையலையும்,
இன்ப அமைதியையும், உழைத்தடைய அருள்வாயாக !!

ஏ.பி.ஜே. அப்துல் கலாம்,
மாண்புமிகு ஜனாதிபதி, இந்தியா
_____________________________

சிகரத்தை அடைந்த பின்பும் தேடலைத் தொடரும் நீங்கள் பல்லாண்டு வாழ வாழ்த்துக்கள்.

ஒரு தேசியின் புலம்பல்கள்...

2005-10-11T18:30:00.000+01:00

வெளிநாட்டிற்கு சம்பாதிக்க வருபவர்கள் பற்றி பெரும்பாலோர் நினைப்பது:

1) வெளிநாட்டில் இருக்கும் அனைவரும் ராஜ வாழ்க்கை வாழுகின்றனர்.
2) அவனுக்கென்ன கார், வீடு என்று வசதியாக இருக்கிறான்.
3) வங்கிக்கணக்கில் எக்கச்சக்கமான பணம் வைத்திருப்பான்.
4) எப்போது பணம் கேட்டாலும் அவனால் பணம் அனுப்ப முடியும்.
5) வெளிநாட்டில் இருந்து தொலைபேசியில் இந்தியாவிற்கு பேசுவது இலவசம்.
6) நம்மையெல்லாம் மறந்து விட்டான். பணத்திமிர் அது தான்(சிலவாரங்கள் தொலைபேசியில் பேசாவிட்டால்..)
7) நாம் என்ன வேண்டுமானாலும் செய்து கொள்ளலாம், உதவி செய்வதற்கு வெளிநாட்டில் இருக்கின்றானே அவன்.
8) பக்கத்து வீட்டவரின் மகன் எவ்வளவு சம்பாதிக்கிறான். இவன் தான் எதுவுமே செய்வதில்லை.
9) பவுண்டு டாலர் மதிப்பு தான் ஏறிக்கொண்டிருக்கிறதே அப்புறம் என்ன?

ஆனால் நிஜம் என்ன?

1) சம்பளத்தில் பெரும்பகுதி வரி கட்டவே போய் விடுகிறது.
2) மற்றொரு பெரும்பகுதி வீட்டு லோன்/வாடகைக்கு போய் விடுகிறது.
3) மற்றும் கவுன்சில் வரி.
4) சொந்தவாகனம் வைத்திருந்தால், இன்சூரன்ஸ், ரோடு வரி, வாகன வரி என்று ஒரு பகுதி போய்விடும். சொந்த வாகனம் இல்லாவிட்டால் ரயில் கட்டணம் பயங்கர அதிகம்.
5) அது ஏன் வீட்டில் தொலைக்காட்சி வைத்திருந்தால் அதற்குக்கூட வரி.
6) அது போல நேசனல் இன்சூரன்ஸ் என்ற பெயரில் பெரும்பகுதி போய்விடும்.
7) அது போக கவுன்சில் டாக்ஸ், காஸ், எலக்ட்ரிசிடி, இன்டெர்னெட் என்று ஒருவருடைய சம்பளம் முழுவதும் போய்விடுகிறது.
8) இதுபோக கிரெடிட் கார்டுகள் வேறு.
9) வருடத்திற்கு ஒருமுறை இந்தியாவிற்கு போகவேண்டிய செலவு வேறு.
10) வீட்டில் இருவரும் வேலைசெய்தே ஆக வேண்டிய கட்டாயம்.
11) வங்கிகள் சும்மா இருப்பதில்லை, ஏதாவது ஒரு லோன் தானாகவே வந்து கொடுத்து அதைவேறு கட்டவேண்டும்.

வரவு எவ்வளவு இருந்தாலும் அதிவிட செலவும் அதிகமாகத்தான் இருக்கிறது. இதெல்லாம் யாருக்கு புரியப்போகிறது? :-(((

24 MBpS அகலப்பாட்டை இணைப்பு

2005-10-03T10:37:00.000+01:00

போன மாதம் தான் இது பற்றி தெரிய வந்தது. 'பி தேர்' என்னும் நிறுவனம் 24 MBps ப்ராட்பேண்ட் இணைப்பை வெறும் 24 பவுண்டுகளுக்கு கொடுக்கிறார்கள். எந்தவிதமான இறக்கல் கட்டுப்பாடுகளுமில்லாத இணைப்பு இது.

இப்போது இருக்கும் 1 MB இணைப்பே படு வேகமாக இருக்கிறது. இருந்தாலும் இப்போது கொடுக்கும் அதே பணத்திற்கு இதைவிட 24 மடங்கு அதி வேக இணைப்பு கிடைக்கும்போது ஏன் விடவேண்டும். உடனடியாக இணைப்புக்கு விண்ணப்பித்து விட்டேன்.

இணைப்பு கிடைத்தவுடன் அந்த அனுபவத்தைப்பற்றி எழுதுகிறேன்.

தனி மனித சுதந்திரம்

2005-09-29T16:16:00.000+01:00

அயல் நாட்டில் நான் பெரிதும் விரும்பும் ஒன்று 'தனிமனித சுதந்திரத்தை மதித்தல்'. சரி. தனிமனித சுதந்திரம் எந்த அளவுக்கு மதிக்கப்படுகிறது? அது அடுத்தவரின் சுதந்திரத்தை பாதிக்காதவரை...

தனி மனித சுதந்திரத்துக்கு மதிப்பு கொடுத்தல் சிறுவயது முதலே ஆரம்பித்து விடுகிறது. குழந்தைகள் அவர்கள் விரும்பியவற்றை தெர்ந்தெடுக்க அனுமதிப்பது, வீட்டில் அவர்களுக்கென்று தனி அறை கொடுத்து அவர்களின் தனிமையையும் தங்களுடைய தனிமைத்தேவையையும் மதிப்பது, குழந்தைகளை விரும்பிய படிப்பு படிக்க விடுவது, அவர்கள் ஒரு வயதுக்கு, தங்களை தாங்களே பார்த்துக்கொள்ளக்கூடிய வயதுக்கு வந்தபிறகு அவர்களின் பொருளாதாரத்தேவைகளை அவர்களே பார்த்துக்கொள்ள வேண்டிய ஒரு தளத்தை ஏற்படுத்துவது என்று எல்லா இடங்களிலும் தனிமனித சுதந்திரத்தை பார்க்கலாம்.

அதேபோல் பொது இடங்களில் மக்கள் கடை பிடிக்கும் ஒழுங்கு ஆச்சரியப்படத்தக்கது. எங்கு பார்த்தாலும் வரிசையில் நிற்கும் ஒழுங்கு கூட தனிமனித சுதந்திரத்தை மதித்தலின் ஒரு பிரதிபலிப்புதான். நீ முதலில் வந்தாய் அதனால் உனக்குத்தான் முதலில் அனுமதி என்று எல்லோரும் அமைதி காத்து பொறுமையாக வரிசையில் நிற்பது என்ற ஒழுங்கெல்லாம் சிறுவயது முதலே கற்றுக்கொடுக்கப்பட்டுவிடுகிறது.

அதே போல் செய்யும் தொழிலில் ஏற்றத்தாழ்வு பாராமையும் மதிக்கத்தக்க ஒன்று. தொழிலால் யாரும் யாரையும் வேறுபடுத்துவதில்லை. சம்பள வித்தியாசமும் பெருமளவில் இருப்பதில்லை. பொருளாதாரம் இதில் பெரும்பங்கு வகித்தாலும், தனி மனிதனுடைய மனப்பான்மை இதில் முக்கியமானது.

மேலே சொன்னவை சில உதாரணங்கள் தான், ஆனால் இங்கு பார்க்கும் பெரும்பாலான நல்ல விஷயங்கள் அனைத்துக்கும் 'தனிமனித சுதந்திரத்தை மதித்தல்' தான் அடிப்படையாக இருக்கிறது. இந்தியாவில் இருந்தவரைக்கும் அவை பற்றி எதுவுமே சிந்திக்காமல் இருந்த மனது இங்கு வந்து இந்த சூழல் பழகி, இந்தமுறை விடுமுறைக்காக இந்தியாவுக்கு சென்றிருந்த போது தான் எந்த அளவிற்கு நமது சமுதாயத்தில் தனிமனித அத்துமீறல்கள் நடக்கின்றன என்பதை உணர முடிந்தது.

ஏன் இப்படி இருக்கிறோம் என்று சிந்தித்து பார்த்தால் அவையெல்லாம் நாம் வளர்ந்த, வளர்க்கப்பட்ட சூழல் அப்படி என்பதை உணர முடிகிறது. நாமும் அதையே அப்படியே இயல்பாக ஏற்றுக்கொண்டு வளர்ந்து விட்டோம் என்பதையும் உணர முடிகிறது. சரி இந்த சூழல் எப்படி மாறும் என்று என்னை நானே கேட்டுகொண்டால் அதை 'உன்னிலிருந்து ஆரம்பித்து செயல்படுத்து!!' என்று உள் மனது சொல்கிறது. அதுவும் சரி தான்....

தமிழ் வாழ்க !!!

2005-09-22T21:58:00.000+01:00

இகாரஸ் ப்ரகாஷின் 'தமிழ் வாழ்க' (இந்தவாரம் மட்டும் :-)) பதிவை பார்த்துவிட்டு, தூண்டப்பட்ட தமிழ்ப்பற்றால் என்னுடைய கணிணியின் மேல் பக்கத்தை திரும்பவும் தமிழில் மாற்றிப்பார்த்தேன்.

பார்க்க நன்றாகத்தான் இருக்கிறது.

நானும் படம் காட்டுறேன்...17th September 05

2005-09-16T21:37:00.000+01:00

'ஊரோடு ஒத்து வாழ்' அப்படீன்னு பெரியவங்க சொல்லியிருக்காங்க...
இதோ என் பங்குக்கு வீட்டிலிருந்து அலுவலகத்துக்கு தினமும் நடந்து சென்று திரும்பும்போது கண்ணில் பட்டதை எடுத்தது...

1) வீட்டிலிருந்து அலுவலத்துக்கு போகும் வழி.

2) போகும் வழியிலுள்ள ஒரு குளத்தில் அன்னம்,

3) புற்களில் பூக்கள்,

4) அருகிலுள்ள ஒடையில் அன்னப்பறவை,

5) விக்டோரியா பூங்காவின் இன்னொரு தோற்றம்,

6) நியூபரி கவுன்சிலின் தோற்றம்,

6) அலுவலகத்திலிருந்து வீட்டுக்கும் திரும்பும் வழி,

(படம் எடுத்தது Sony F828 Cybershot கேமராவில்.)

7) இது முகமூடியின் பின்னூட்டத்தை பார்த்தபின் சேர்த்தது. இந்தப்படம் Cumbria- எனப்படும் Lake district என்ற இடத்திற்கு போயிருந்த போது எடுத்தது.

சத்யா !!

2005-09-13T13:38:00.000+01:00

இரண்டு நாளைக்கு முன்பு புதிய மெயில் வந்திருக்கிறதா என்பதற்காக யாகூவை திறந்த போது தான் அந்த அதிர்ச்சியான செய்தி எனக்காக காத்திருந்தது. போன வாரம் என் நண்பன் சத்யா இறந்துவிட்டான் என்று இரண்டு வரி மெயில்.. உடைந்து போய் அப்படியே திரையை பார்த்துக்கொண்டு உட்கார்ந்திருந்தேன். என்ன செய்வதென்று தெரியவில்லை. அழுவதற்கும் கூட தெரியவில்லை.

நான் எனது கல்லூரியில் சேர்வதற்கு முன்னாலேயே என் நண்பன் ஒருவன் மூலம் எனக்குத்தெரிந்த ஒரே பெயர் சத்யா. இரண்டு வருடன் ஒரே வீட்டில் நாங்கள் தங்கியிருந்தோம். அவன் மறைந்துவிட்டான் என்பதற்காக சொல்லும் புகழ் மொழியல்ல.... அவனைப்போல் அருமையான மனிதனை பார்ப்பது கடினம். எல்லோரிடமும் இனிமையாகப்பழகுவான். கல்லூரியில் எல்லா துறையியிலும் அவனுக்கு நண்பர்கள் இருந்தார்கள். யாரும் கேட்காமலேயே உதவி செய்வான். அவனிடமிருந்த அந்த குணங்கள் தான் அவனை கல்லூரி மாணவர் தலைவன் தேர்தலில் அவனை வெற்றி பெற வைத்தது.

கல்லூரி முடித்தவுடன் நேராக குவைத்திற்கு சென்றான் என்று மட்டும் கேள்விப்பட்டேன். எந்தவித தொடர்பும் இல்லாமல் இருந்தோம். அவ்வப்போது நண்பர்கள் மூலம் அவனைப்பற்றிய செய்திகளை பறிமாரிக்கொள்வதோடு சரி.. மூன்று நான்கு வருடங்களுக்கு முன்னால், ஒருநாள் சத்யாவிற்கு குவைத்தில் உள்ள மருத்துவர் ஒருவர் தவறான மருந்தை கொடுத்ததால் அவன் உயிருக்கே ஆபத்தான நிலையில் இந்தியாவிற்கு திரும்பிவிட்டான் என்று கேள்விப்பட்டேன். கடுமையான போரட்டத்திற்குப்பின்பு உடல்நிலை சகஜ நிலைக்கு திரும்பி வந்தவுடன் சிங்கப்பூரில் வேலை கிடைத்து அங்கு ஒரு சில வருடம் வேலை செய்தான். திரும்பவும் உடல் நிலை சரியில்லாமல் போகவும், இந்தியா திரும்பிவிட்டான்.

அதற்குப்பிறகு போன வருடம் அவனுடைய கைத்தொலைபேசி எண் கிடைத்து அவனை தொடர்பு கொண்ட போது அவ்வளவு உற்சாகமாக வாழ்க்கையில் அவ்வளவு நம்பிக்கையாக பேசினான். ஒரு உடை ஏற்றுமதி தொழில் அவனது நண்பனுடன் சேர்ந்து செய்ய இருப்பதாகவும் அதற்கு ஏதாவது நான் இங்கு ஏதாவது உதவி செய்ய முடியுமா என்று கேட்டான். அதுவிஷயமாக நாங்கள் பல மெயில்களைப்பறிமாறிக்கொண்டோம்.

போனவருடம் அவனிடமிடுந்து ஒரு மெயில் வந்திருந்தது. அதில் அவன் சினிமாவில் உதவி டைரக்டராக முயற்சி செய்து கொண்டிருப்பதாகவும், அதற்குப்பிறகு நடிகர் பொன்னம்பலம் தயாரித்து இயக்கும் ஒரு படத்திற்கு உதவி இயக்குனராக பணி புரிந்து கொண்டிருப்பதாகவும், அவனின் வாழ்க்கை லட்சியமான சினிமா இயக்குனராவதை சீக்கிரம் அடைந்து விடுவேன் என்று ஒரு நம்பிக்கையான ஒரு மெயில். அதற்குப்பிறகு எந்தவிதமான தொடர்பும் இல்லை.

இன்று கடைசியாக வந்த செய்தியின் படி இது ரத்தத்தில் வெள்ளை அணுக்களின் எண்ணிக்கை குறைந்ததால் ஏற்பட்டதாம்.

மரணம் என்பது இயற்கையின் நியதியென்றாலும் இது போன்ற அகால மரணங்கள் ஏற்படுத்தும் தாக்கங்கள் தாங்கிக்கொள்ள் முடியாதவையாகவிருக்கின்றன.. எண்ணிப்பார்க்கும்போது சத்யா இறந்த செய்தி எனக்கு தெரியாமலேயே இருந்திருக்கலாமோ என்று தோன்றுகிறது. எங்கோ எப்படியோ வாழ்ந்து கொண்டிருக்கிறான் என்று என் எண்ணங்களிலாவது வாழ்ந்து கொண்டிருந்திருப்பான்.

வாழ்க்கையில் பல லட்சியங்களுடன் முன்னேறத்துடித்துக்கொண்டிருந்த ஒரு இளைஞனின் வாழ்க்கையை ஒரு மருத்துவர் கொடுத்த தவறான மருந்து சீரழித்து அதனால் ஏற்பட்ட பாதிப்பிலிருந்து மீண்டு வருவதற்கான மிகுந்த போராட்டத்திற்கிடையில் இறந்து போனதை பார்க்கும்போது வாழ்க்கையின் மீது கோபம் தான் வருகிறது.

இந்நேரத்தில் சுவாமி சுகபோதானந்தா சொன்னது ஞாபகம் வருகிறது.. 'SUCH IS THE WAY OF LIFE'

பிரபலங்களிடம் தான் அப்படி என்ன ஈர்ப்பு !!

2005-09-10T16:18:00.000+01:00

இப்போது தான் இந்த படத்தை ஆனந்த விகடனில் பார்க்க நேர்ந்தது.

பார்த்தவுடன் படத்தில் கவனிக்கத்தோன்றியது சுற்றியுள்ள ரசிகர்களின் முகத்தில் உள்ள பரவசம். பாருங்களேன் உங்களுக்கே தெரியும்.

எதனால் அப்படி?

-எல்லோருக்கும் தெரிந்த பிரபலமானவரை நான் நேரில் சந்தித்தேன் என்பதை எல்லோரிடமும் சொல்லிப்பெருமைப்படலாம் என்பதில் வரும் ஒரு நிமிட சந்தோஷமா?

-திரையில் பார்த்த அல்லது கேள்விப்பட்ட பிரபலத்தை ஒரு சக மனிதராக நேரில் சந்திக்கும்போது ஏற்படும் அதிர்ச்சியின் வெளிப்பாடா?

இங்கேயே !! இப்பொழுதே !! - Part 9

2005-09-09T20:01:00.000+01:00

எப்போதாவது மனம் நிலையில்லாமல் தவிப்பதை உணர்ந்திருக்கிறீர்களா? ஒரு வேலை செய்து கொண்டிருக்கும் போது மனம் மற்றொன்றை நினைத்து அலை பாய்ந்து கொண்டிருக்கும். சரியென்று அந்த மற்றொரு வேலையை செய்ய ஆரம்பித்தால் வேறொன்றை நினைத்து அலை பாயும்.அப்போது அந்த கணத்தில் செய்து கொண்டிருக்கும் வேலையில் முழு கவனமும் செலுத்த முடியாமையில் மனம் தடுமாறும்...

பெரும்பாலான சமயங்களில் நமது மனத்திற்கு குரங்கு என்று பெயரிட்டு அதை அப்படியே அதன் குறைகளோடு ஏற்றுக்கொண்டு அதனுடன் வாழ பழகிவிட்டோம். (அப்படியே சக மனிதர்களையும் அவர்களுடைய குறை நிறைகளோடு ஏற்றுக்கொண்டு வாழ பழகிக்கொண்டால் எவ்வளவு நன்றாக இருக்கும் ?!!!)

'இங்கே இப்போது' என்பது தான் நிஜம். 'here and now ' என்று ஒரு பெரிய தத்துவமே இருக்கிறது. அதை சரியாக புரிந்து கொண்டு எத்தனை பேர் வாழ்க்கையை சரியாக வாழ்க்கற்றுக்கொண்டிருக்கிறோம்.

சுவாமி சுகபோதானந்தா கூறியிருப்பார்.
'நேற்று என்பது வரலாறு. நாளை என்பது கணிக்க முடியாத் தெரியாதவொரு புதிர், இன்று என்பது நமக்கு கொடுக்கப்பட்ட பரிசு. அதற்காகத்தான் இதை ஆங்கிலத்தில் PRESENT என்று கூறுகிறார்கள் என்று. அது எவ்வளவு நிஜம் !!!

ஜக்கி வாசுதேவ் சொன்னது போல்,

'ஓய்வாக இருந்தபோது, வேலை கிடைக்காதா என்று ஏங்கினீர்கள். கிடைத்தவுடன் சந்தோஷத்தையெல்லாம் இழந்து, படபடப்புடன் ரத்த அழுத்த நோயை வரவழைத்துக் கொள்கிறீர்கள்! பதவி உயர்வு கிடைக்கும்வரை, அதற்காகப் போராடினீர்கள். இப்போது நிமிடத்துக்கு நிமிடம் டென்ஷன் என்கிறீர்கள். இன்னும் உயரத்துக்குப் போனால், என்ன சொல்வீர்களோ? முன்னால் நிம்மதியாக இருந்தேன். இப்போது அமைதியே போயிற்று என்பீர்களா?

'வாழ்க்கையைத் தொலைத்துவிட்டு வசதிகளைப் பெருக்கிக்கொள்வது, செத்த கிளிக்குத் தங்கக் கூண்டு செய்து கொடுப்பது போல்!'

ரேசிசம்... ரேசிசம்...ரேசிசம்...

2005-09-02T17:29:00.000+01:00

அயல்நாட்டு வாழ்க்கையைப்பற்றி பேசும்போது பெரும்பாலான நண்பர்கள் கேட்கும் ஒரு கேள்வி. அங்கு ரேசிஸம் இருக்கிறதா என்பது தான். அப்படி கேட்பவர்களுக்கெல்லாம் நான் சொல்லும் பதில் இது தான்.

கல்லூரிப்படிப்பை முடித்துவிட்டு நேராக வேலைக்காக சென்ற ஊர் பெங்களூர். அழகான பூங்காக்களை நகரின் மையப்பகுதியில் கொண்ட அருமையான ஒரு ஊர். நட்புடன் பழகும் மக்கள், தட்ப வெப்ப நிலையைப்பற்றி சொல்லுவதென்றால் குளிர்பதனப்படுத்தப்பட்ட நகரம். அதனால் பல பன்னாட்டு நிறுவனங்கள்.. அதனால் நல்ல வேலை வாய்ப்பு. பெங்களூரின் மக்கள் தொகையில் பெரும்பாலோனோர் வேறு மாநிலத்தை சேர்ந்தவர்கள். முக்கியமாக சொல்லக்கூடிய ஒன்று, பெரும்பாலும் நேர்மையான ஆட்டோ ஓட்டுனர்கள்.

இவ்வளவு இருந்தும் பெங்களூரில் எப்போதும் ஒரு அயல்நாட்டில் வசிக்கும் ஒரு உணர்ச்சியே எப்போதும் என் அடிமனத்தில் இருந்து வந்தது. அதுவும் நவம்பர் மாதம் வந்துவிட்டால் போதும் எங்கு பார்த்தாலும் சிவப்பு மஞ்சள் கொடி பறந்து கொண்டு இருக்கும். தனக்கென்று தனிக்கொடி உள்ள ஒரே மாநிலம் கர்நாடகா என்று தான் நினைக்கிறேன். நான் இருந்த நேரம் காவிரிப்பிரச்சினை உச்சத்தில் இருந்த நேரம். இப்போது நிலைமை வருண பகவான் தயவில் கொஞ்சம் பரவாயில்லை என்று நினைக்கிறேன்.

அதுவும் வீரப்பன் நடிகர் ராஜ்குமாரை கடத்திக்கொண்டு போனபோது நடந்த சம்பவங்களை மறக்கவே முடியாது. நான் வேலை பார்த்துக்கொண்டிருந்த அலுவலகம் பெங்களூருக்கு வெளியே 20 கி.மீ தொலைவில் இருந்தது. அதுவும் என்னுடைய யமஹா வண்டி தமிழ்நாடு registration-ல் இருந்தது. நண்பர்கள் அனைவரும் இதை வெளியே கொண்டு போனால் நீ வீடு போய் சேர முடியாது என்று சொல்லிவிட்டனர். அவர்கள் சொன்னது சரியென்று நண்பனின் வண்டியை எடுத்துக்கொண்டு கிளம்பினேன். வழியெங்கும் டயர்களை எரித்துக்கொண்டு இருந்தனர், அதனால் ஒரே புகை மூட்டம். ஒவ்வொரு இடத்திலும் வண்டியை நிறுத்தி கன்னடத்தில் பேசச்சொல்லி போக விட்டனர். அவர்கள் முகத்தில் இருந்த வெறியை இன்னும் மறக்க முடியாது. அதிலும் ஒரு சிறுவன் அவனுக்கு ஒரு பத்து வயது தான் இருக்கும் அவனெல்லாம் என்னை நிறுத்தி பேசச்சொல்லி வழிவிட்டான்.

எனக்கு சரளமாக கன்னடம் பேச வரும் என்பதால் எந்த பிரச்சினையும் இல்லாமல் வீடு சேர முடிந்தது. வீடு வந்து கண்ணாடியில் முகத்தை பார்த்தால் முகமெல்லாம் ஒரே புகைமூட்டத்தால் எற்பட்ட கரி படிந்து இருந்தது. மனமெங்கும் ஒரே புகை. இப்படியும் இந்த ஊரில் இருக்கவேண்டுமா என்ற ஒரு கேள்வி. வீட்டுக்கு வந்து தொலைக்காட்சியை போட்டால் எல்லா தமிழ் சேனல்களும் வரவில்லை. எல்லா தமிழ் சேனல்களையும் துண்டித்து விட்டனர். அப்போது எனக்கிருந்த மனநிலையை வார்த்தைகளாக்குவது கடினம்.

அதையெல்லாம் எண்ணிப்பார்க்கும்போது இங்கு இதுவரைக்கும் சந்திக்க நேர்ந்திராத ஆனால் ஆங்காங்கே கேள்விப்பட்டிருக்கின்ற ரேசிசம் ஒரு பெரிய பிரச்சினையே இல்லை என்று தான் சொல்லத்தோன்றுகிறது.

மொழியால் மனிதனை வேறுபடுத்தல், ஜாதியால் வேறுபடுத்தல், தொழிலால் வேறுபடுத்தல், பணவசதியால் வேறுபடுத்தல் என்று இவ்வளவு வேறுபாடுகள் உள்ள நமது சமுதாயத்தை எது தான் இன்னும் கட்டுக்கோப்புக்குள் வைத்திருக்கிறது என்பது இன்னும் ஒரு விளங்காத ஒரு புதிர்.

அப்பத்தா கொடுத்த விளக்கு..

2005-09-01T22:18:00.000+01:00

பொதுவாகவே எனக்கு தொலைக்காட்சிகளில் மூழ்கிக்கிடப்பது அவ்வளவாக பிடிக்காது. ஆனால் அவ்வப்போது விரும்பிப்பார்க்கும் ஒன்று antique show, பழமைப்பொருள்களை ஏலத்தில் விடுவது பற்றிய தொலைக்காட்சி நிகழ்ச்சி. இந்த நாட்டில் பழமைப்பொருட்களுக்கு கொடுக்கும் முக்கியத்துவத்தை பார்த்து அதிசயித்து போய் இருக்கின்றேன். அதே சமயத்தில் நமது நாட்டில் அதற்கு அவ்வளவாக முக்கியத்துவம் கொடுக்கப்படாதது பார்த்து வருத்தமாகவும் இருக்கும்.

கடந்த முறை விடுமுறைக்காக ஊருக்கு போயிருந்த போது பார்த்தபோது எனது அய்யா வீட்டில் இருந்த பழைய அலங்கார மேஜையை வெளியே கொல்லைப்புரத்தில் தூக்கிப்போட்டிருந்தார்கள்.. பார்க்கவே அதிர்ச்சியாக இருந்தது. அருமையான வேலைப்பாட்டுள்ள மேஜை அது. அதைப்பார்க்கும்போது சிறுவயதில் அதன் மீது ஏறி விளையாடியது, அதில் இருக்கும் முகம் பார்க்கும் கண்ணாடியில் உயரம் பத்தாததால் எம்பிக்குதித்து முகம் பார்த்தது எல்லாம் ஞாபகம் வந்தது. அதை ஏன் வெளியே தூக்கிப்போட்டீர்கள் என்று கேட்டதற்கு, அது எதற்கு? பழசாகிவிட்டது அல்லவா? புதிது வாங்கிக்கொள்ளலாம் என்று சொன்னார்கள். அதை என்னால் சகித்துக்கொள்ளவே முடியவில்லை. உடனடியாக மரவேலை செய்பவரை அழைத்து அதை பழுது பார்க்கச்சொல்லி மெருகூட்டச்சொல்லி வீட்டிற்கு உள்ளே வைத்தோம்.

அதே போல் எனது அப்பத்தாவிடம்(அப்பாவின் அம்மா) பழைய கதைகளை கேட்டு அதை குறித்து வைத்துக்கொண்டோம். அவையெல்லாம் கேட்க எவ்வளவு இனிமையானவை தெரியுமா? ஏதாவது ஒரு கேள்வி கேட்டால் அவர் எவ்வளவு ஆர்வமாக பதில் சொல்லுகிறார் !! அவரின் பதில்களில் எவ்வளவு விஷயங்கள் தெரிய வருகின்றன!! ஏதாவது memory transfer technique இருந்தால் அவற்றையெல்லாம் அவரின் நினைவுகளில் இருந்து copy and paste பண்ணிக்கொள்ளலாம் என்று கூட ஆசையாக இருந்தது.

என் மனைவியும் அப்பத்தாவிடம் ஆசிர்வாதம் வாங்கும்போது அவரிடம் இருக்கும் ஒரு மிகப்பழமையான பொருள் ஒன்றை கொடுக்குமாறு வேண்டிக்கொண்டார். அதற்கு அப்பத்தா அவர் திருமணத்தின் போது சீராக கொண்டு போன சிறு விளக்கை கொடுத்தார். அதை கொடுக்கும்போது தான் அவர் கண்களில் எத்தனை மகிழ்ச்சி!! அதை பத்திரமாக கொண்டு வந்து பூஜையறையில் வைத்திருக்கிறோம்.

சிலவை பக்கத்தில் இருக்கும்போது அதன் அருமை நமக்கு தெரிவதில்லை.

How to eat an elephant? - Part 8

2005-08-26T21:01:00.000+01:00

பெரும்பாலான பயிற்சி முகாம்களில் சொல்லப்படும் ஒன்று 'How to eat an elephant?'

யாருக்காவது விடை தெரியுமா?....விடை சுலபம். 'By cutting in to small pieces'.

அது எதற்காக சொல்லுவதென்றால், எந்த ஒரு குறிக்கோள் மற்றும் லட்சியம் அனைத்தும் முதலில் பார்ப்பதற்கு யானையைப்போல் பெரிதாகத்தான் இருக்கும். ஆனால் அதை அடைவதற்கான வழிமுறைகளை சிறு சிறு short term goal-களாக மாற்றிவிடுங்கள். அதன் பிறகு short term Goal-களை தினசரி வேலைகளாக மாற்றி திட்டமிடுவது தான் லட்சியத்தை அடைவதற்கான ஒரே வழி.

Stephen covey சொல்லியிருப்பார்,
'efficiency' மற்றும் 'effectiveness' இரண்டுக்கும் என்ன வித்தியாசம்.
efficiency என்பது செய்யும் வேலையை சரியாக செய்வது. effectiveness என்பது சரியான வேலையை செய்வது.

எனவே முதலில் சரியான வேலையை செய்ய வேண்டும் அடுத்து அந்த சரியான வேலையை சரியாக செய்யவேண்டும். படிக்க கொஞ்சம் விசுத்தனமாக இருப்பதற்கு மன்னிக்கவும்.

சரி நாம் செய்யும் வேலை சரியாக இல்லையா என்று எப்படி கண்டுபிடிப்பது?
அது நமது வாழ்க்கை லட்சியம் இருக்கும் திசையை சார்ந்து இருக்கிறதா என்றுதான். அதை செய்வதால் ஏதேனும் நமது வாழ்க்கைக்கு value addition எதுவும் இருக்கிறதா என்று தான்.

கீழிருக்கும் படத்தைப்பாருங்கள். இந்தப்படத்தில் மேலே இருப்பது வாழ்க்கையின் லட்சியம். அது சிறு சிறு குறிக்கோள்களாக பிரிக்கப்பட்டுள்ளது. அந்த குறிக்கோள்கள் சிறு சிறு திட்டமிடல்களாக பிரிக்கப்பட்டுள்ளது.

எடுத்துக்காட்டாக நம் வாழ்க்கையின் லட்சியம் ஒரு பெரிய தொழிலதிபராவது என்று வைத்துக்கொள்வோம்.

குறிக்கோள்களாக கீழ்க்கண்டவற்றை எடுத்துக்கொள்ளலாம்.
1) எந்த துறையில் தொழில் ஆரம்பிக்கலாம் என்று முடிவு செய்வது.
2) தொழில் சம்பந்தமான நுணுக்கங்களை கற்றுக்கொள்வது
3) தொழிலுக்கு தேவையான மூல தனத்தை திரட்டுவது.
4) சிறிய அளவில் தொழிற்சாலை ஆரம்பிப்பது.
5) தொழிற்சாலையை விரிவு படுத்துவது.

அதற்கு அடுத்த அளவில் ஒவ்வொன்றையும் தினசரி திட்டமிடல்களாக மாற்றலாம்,

1) தொழில் சம்பந்தமான புத்தகங்களை படித்தல்.
2) பகுதி நேர நிர்வாக சம்பந்தமான படிப்பு பற்றி விசாரித்தல்
3) வங்கிகளில் முதலீடு பற்றிய செய்திகளை அறிந்து கொள்ளல்.
4)......

இப்படி சொல்லிக்கொண்டே போகலாம். இது ஒரு எளிய எடுத்துக்காட்டு.

பெங்களூரில் பணிபுரிந்துகொண்டிருக்கும்போது கலந்து கொண்ட ஒரு பயிற்சி முகாமில் இது பற்றிய ஒரு Role Play இருந்தது. அதை முடித்தவுடன் எனக்குத்தெரிந்த ஒருவர் ITC யில் வேலை பார்த்துக்கொண்டிருந்த அருமையான வேலையை ராஜினாமா செய்துவிட்டு சொந்தமாக தொழில் ஆரம்பித்தார். அதற்கு அவர் சொன்ன காரணம், @நான் சிகரெட் தொழிற்சாலையில் செய்து கொண்டிருக்கும் வேலை எனது personal value system-க்கு எதிராக இருக்கிறது. அதனால் என்னுடைய குறிக்கோளை என்னுடைய value system-க்கு தகுந்தது போல் அமைத்துக்கொண்டுள்ளேன்" என்றுதான்.

இன்றே தனிமையில் அமருவோம், நம்மை பற்றி நாமே ஒரு சுய ஆராய்ச்சி பண்ணுவோம். நம்மை நாமே கேட்போம் நாம் என்னவாக ஆக விரும்புகிறோம் என்று... என்ன சாதிக்க விரும்புகிறோம் என்று.. அதன் பின்பு அது பற்றி கனவுகாண்போம். நமது சிந்தனைகளை அது பற்றியே சுழல விடுவோம். பின்பு அது பற்றிய சிந்தனைகளை பட்டியலிடுவோம்... சிறிது சிறிதாக செயல்படுத்துவோம். அந்த சிறிய சிறிய வெற்றிகள் தரும் நம்பிக்கை நம்மை நம் லட்சியத்திற்கு வெகு சீக்கிரத்தில் எடுத்துச்செல்லும்....

நேர நிர்வாகம் - Time Management - Part 7

2005-08-24T21:53:00.000+01:00

இதுவரை உடலளவிலும் மனத்தளவிலும் நம்மை எப்படி தயார் படுத்திக்கொள்வது என்பது பற்றியான கருத்துக்களை விவாதித்தோம். இந்த பதிவில் நம் அனைவருக்கும் முக்கியமான ஒன்றான நேர நிர்வாகம்' (Time Management) பற்றி பார்ப்போம்.

நேரம் தான் நம்மிடம் இருக்கும் முக்கியமான மூலதனம். அதை சரியாக நிர்வகித்தால் கிடைக்கும் பலன்கள் ஏராளம். நம்மில் பலருமே நம்முடைய சோம்பல் குணம் மற்றும் தள்ளிப்போடும் குணத்திற்கு நேரத்தைத்தான் குற்றம் சாட்டிக்கொண்டுருக்கின்றோம். நம்மில் எல்லோரும் வாழ்வில் ஒருமுறையாவது 'எனக்கு நேரமே பத்துவதில்லை' என்று அங்கலாய்த்திருப்போம்.

முதலில் நாம் நமக்கு ஒரு நாளில் எவ்வளவு நேரம் கிடைக்கிறது என்று பார்ப்போம்.

வார நாட்களில்,
தூக்கம் = 8 மணி நேரம்.
அலுவலகம் = 9 மணி நேரம்.
அலுவலகம் போய் வர பயணம் = 2 மணி நேரம்.
காலைக்கடன்கள் = 1 மணி நேரம்
காலை இரவு உணவு உண்பதற்கு = 1 மணி நேரம்.
ஆக மொத்தம் = 21 மணி நேரம்

ஆக வார நாட்களில் நமக்கு 3 மணி நேரம் கிடைக்கிறது.

வாரக்கடைசிகளில்.
தூக்கம் = 10 மணி நேரம்.
காலைக்கடன்கள் = 1 மணி நேரம்.
உணவருந்தல் = 2 மணி நேரம்.

ஆக வாரக்கடைசிகளில் மொத்தம் 9 மணி நேரம் நமக்கு கிடைக்கிறது.

நாம் பெரும்பாலும் நம் கையில் இருக்கும் இந்த முப்பது மணிக்கும் மேலான நேரத்தை சரியாக திட்டமிடாததால், தேவையில்லாத காரியங்களுக்கு உபயோகிக்கிறோம். Time is money என்று மிகச்சரியாகத்தான் சொன்னார்கள். கையில் இருக்கும் பணத்தை திட்டமிடாவிட்டால் எப்படி கரையும் என்பதே தெரியாது. அதே போல் தான் நமது நேரமும்.

நம்மில் எல்லோருக்கும கீழ்க்கண்ட பெரும்பாலானவற்றை செய்ய ஆசை.

1) தியானம்
2) உடற்பயிற்சி
3) நூலகங்களுக்கு சென்று நல்ல புத்தகங்கள் படித்தல்.
4) வாகனம், வீடு ஆகியவற்றை எப்போதும் சுத்தமாக வைத்துக்கொள்ளல். (இதை டைப் பண்ணும் போது தான் பார்க்கிறேன், மானிட்டர், கீ போர்டில் அவ்வளவு அழுக்கு :-( )
5) மனைவி மக்களுடன் கடற்கரை அல்லது பூங்காவிற்கு அழைத்துச்சென்று மனதை இதப்படுத்திக்கொள்ளல்.
6) உறவினர்களிடம் தொடர்பில் இருத்தல்.
7) வீட்டில் தோட்டம் இடல் அல்லது தோட்டத்தை பராமரித்தல்.
8) பகுதி நேர மேற்படிப்பு படித்தல்.

ஆனால் எவ்வளவு பேர் அவற்றை தொடர்ந்து செய்கிறோம்? பழி போடுவதற்குத்தான் இருக்கிறதே பாவம் 'நேரம்'.

சரி, நேரத்தை எப்படி நிர்வகிப்பது?

நேர நிர்வாகம் என்பது பெரிய ஒன்றும் கடினமான ஒன்றும் இல்லை. எளிதாக சொல்லுவதென்றால் பணத்தின் செலவுக்கு budget போடுவது போல் நம்மிடம் இருக்கும் நேரத்துக்கு budget போடுவது.

1) ஒவ்வொரு நாளும் அன்றைய நாளுக்காக திட்டமிடுதல்.
2) திட்டமிடுதலை, முடிந்த வரை நிறைவேற்றுதல்.
3) நிறைவேற்ற முடியாதவற்றை ஆராய்தல்.

சிலபேரை பார்த்திருப்பீர்கள் தொடர்ந்து வேலை பார்த்துக்கொண்டே இருப்பார்கள். ஆனால் output அந்த அளவுக்கு இருக்காது. ஆங்கிலத்தில் சொல்லுவார்கள் 'Don't work hard. Work Smart' என்று. அதாவது கடினமாக வேலை செய்யாதே, புத்திசாலித்தனமாக வேலை செய். நேர நிர்வாகம் என்பது புத்திசாலித்தனமாக வேலை செய்ய உதவும் ஒரு கருவி.

சில பேர் நான் ஒரு palm top வாங்க வேண்டும் அதன் பிறகு தான் என்னுடைய வேலைகளை நிர்வகிக்க வேண்டும் என்று இதைத்தள்ளிப்போட்டுக்கொண்டே போவதை பார்த்திருக்கிறேன். அது போன்ற உபகரணங்கள் எல்லாம் தேவையே இல்லை. visiting card- அளவுக்கு இருக்கக்கூடிய ஒரு காகிதம் இருந்தாலே போதும். அதிலிருந்து ஆரம்பிக்கலாம். அல்லது ஒரு டயரி இருந்தால் போதும். எப்போதும் கணினியின் முன்னால் இருப்பவர்கள் outlook அல்லது yahoo போன்றவை கொடுக்கும் வசதிகளை பயன்படுத்தலாம்.

இன்னும் எளிதாக்குவதற்கு நேர நிர்வாகத்தை நாம் இரண்டாக பிரித்துக்கொள்ளலாம்.

1) அலுவலக நேர நிர்வாகம்
2) வீட்டு நேர நிர்வாகம்.

- வீட்டு வேலைகளை முந்தைய நாள் படுக்கப்போகும் முன்பு திட்டமிடுதல் நல்லது.
- அதே போல் முதலில் ஆரம்பிக்கும்போது எளிதான சாதிக்கக்கூடிய அளவிற்கு திட்டமிடலாம்.
- அதே போல் அலுவலகத்திலும் அன்றைய வேலைகளை ஆரம்பிப்பதற்கு முன்பே திட்டமிடுதல் மிகவும் பயனுள்ளது.
- ஒவ்வொரு வேலையையும் முடித்தவுடன் அதை அடித்து விடலாம் அது அடுத்த வேலையை செய்வதற்கான உற்சாகத்தைக்கொடுக்கும்.
- அலுவலகத்தில் அந்த நாளின் முடிவில் எவ்வளவு திட்டமிட்டோம் எவ்வளவும் முடித்திருக்கிறோம் என்று சரி பார்த்துக்கொள்வது நல்லது. அதே போல் இரவு
படுக்கப்போகும் முன் இதை அலசுதல் நல்லது. இது நமது திட்டமிடும் திறனை வளர்க்கும்.
- நிறைவேற்ற முடியாதவற்றை பற்றி அலசுதல், அதை நிறைவேற்ற என்னவெல்லாம் தேவைபடுகிறது என்று திட்டமிடுதல் மிகவும் அவசியம்.

மேலே சொல்லியவை ஒரு எளிய ஆரம்பத்திற்கான வழி முறைகள். ஒருமுறை முயற்சி செய்து பார்க்கலாமே?

மன அழுத்தம் (mental stress) - Part 6

2005-08-20T14:35:00.000+01:00

இயந்திர வாழ்க்கையில் நாம் எத்தனையோ வகைகளில் மன அழுத்தத்திற்கு உள்ளாகின்றோம். பணப்பிரச்சினை, வேலை மாற்றம், இட மாற்றம் மற்றும் குடும்பப்பிரச்சினைகள் போன்ற எத்தனையோ விஷயங்கள் நமது உணர்ச்சிகளை பாதிப்புக்கு உள்ளாக்குகின்றன. விளைவு மன அழுத்தம்.

இது போன்ற மன அழுத்தம், மனக்குழப்பம், மனச்சோர்வு அனைத்தும் மனித உணர்ச்சிகளின் ஒரு பகுதிதான். ஆனால் அதை எப்படி கையாளுகிறோம் என்பதில் தான் நமது வெற்றியே இருக்கிறது. நம்மில் நிறைய பேருக்கு நமக்கு மன அழுத்தம் இருக்கிறது என்ற ஒன்றே தெரியாமல் இருக்க்கிறது. விளைவு நமது மன அழுத்தின் வெளிப்பாடாக எழும் கோபத்தை வேறு எதன் மீதாவது யார் மீதாவது காண்பிக்க வேண்டிய நிர்பந்தம். அதனால் மீண்டும் மன அழுத்தம்.... இப்படியே ஒரு சுழல்...

சரி... நமக்கு மன அழுத்தம் இருக்கிறது என்று எப்படி கண்டுபிடிப்பது?

- எப்பொழுதும் சோர்வாக இருப்பது
- அளவுக்கதிகமான கோபம்
- எதற்கெடுதாலும் எரிந்து விழுவது.
- சரியான தூக்கமின்மை.
- எதிலும் கவனம் செலுத்த முடியாமை மற்றும் முடிவெடுக்க முடியாமை.
- அதிகமான புகைப்பிடித்தல் மற்றும் குடிப்பழக்கம்.

சரி, மன அழுத்தத்தை யாருடைய உதவியும் இல்லாமல் நானே சமாளித்துவிடுவேன் என்று நம்மை நாமே ஏமாற்றிக்கொள்ள வேண்டாம். இதற்கு ஒரே மருந்து பகிர்தல் தான். மனம் விட்டுப்பேசுதல் தான். அது வாழ்க்கை துணையாக இருக்கட்டும் அல்லது நண்பராகவோ அல்லது அதுவும் இல்லாவிட்டால் நமது சுயத்தை தெரிவிக்காமல் பகிர்தலுக்காகவென்றே நிறைய குழுக்களும் இணையத்தில் இருக்கின்றன. அதுவும் முடியாவிட்டால் நல்ல மருத்துவரை நாடுவது தான் நல்லது.

பெண்களாவது பரவாயில்லை... ஆண்கள் பெரும்பாலும் வேரொருவடன் அவர்கள் சந்திக்கும் பிரச்சினைகளை மனம் விட்டுப்பேசுவதில்லை. உள்ளுக்குள் வைத்து புழுங்கிக்கொண்டிருப்பது மன அழுத்தத்தை அதிகரித்து நிலைமையை மேலும் மோசமாக்குகிறது.

பகிர்தலைத்தவிர மன அழுத்தத்தை குறைக்க வேறென்ன செய்யலாம்?

-தியானம் - மிக முக்கியமான ஒன்று. அவை உங்களின் சுயத்தை உணர்வதற்கு உதவுகின்றன. இதைப்பற்றி பின்பு வரும் பதிவுகளில் நிறைய பார்க்கலாம்.
-ஏதாவது விளையாட்டு, கலை அல்லது இசையில் உங்களை ஈடுபடுத்திக்கொள்ளலாம்.

இதை முயற்சி செய்து பாருங்கள்.

- அருகிலிருக்கும் பூங்காவிற்கு சென்று மகன்/மகள், அல்லது நண்பர்களுடன் சென்று எளிய விளையாட்டுக்களை விளையாடுதல்.(பந்து, தட்டு விளையாட்டு)
- நல்ல மனதுக்குப்பிடித்த இசையை கேட்டல்
- நல்ல புத்தகங்களை படிப்பதற்கு நேரம் ஒதுக்கி படித்தல்.
- நம் பழைய நண்பர்களுடன் தொடர்பு கொண்டு இனிமையான பழைய நினைவுகளை தட்டி எழுப்பி பகிர்ந்து கொள்ளல்.
- அதிகாலையில் கொஞ்சம் சீக்கிரமாக எழுந்திரித்து நடை, ஓட்டம் அல்லது cycling செல்வது உடற்பயிற்சி மட்டும் அல்ல, மனப்பயிற்சியும் கூட.

அதிகாலையில் எழும்பும் சூரியன் எவ்வளவு அழகு தெரியுமா?

KISS - Keep It Short & Simple - Part 5

2005-08-15T21:16:00.000+01:00

போன பதிவில் சீரான உணவுகளை பற்றியும் ஆரோக்கியமான உணவுப்பழக்கங்களைப்பற்றியும் பார்த்தோம். இந்த பதிவில் ஆரோக்கியமான உணவை சரியான அளவில் உண்பது என்பது பற்றி பரிசீலிப்போம்.

நாம் தேவைக்கதிகமாக உண்கிறோமா இல்லையா என்பதற்கான முக்கியமான காட்டி என்பது நமது உடலின் எடை தான். ஆரோக்கியமான உணவு, அதற்கேற்ற உடல் அசைவு என்பது மட்டுமே நமது உடலின் எடையை கட்டுப்படுத்துவதாக இருக்கும்.

நாம் நமது உயரத்திற்கு ஏற்ற எடைக்குள் இருக்கின்றோமா என்பதை கண்டு பிடிக்க BMI (Body Mass Index) Ratio என்ற விகிதக்கணக்கு உதவுகிறது.

கீழ்க்கண்ட படம் நமது உயரத்திற்கு நாம் எவ்வளவு எடை இருக்கலாம் என்று கண்டுபிடிக்க உதவுகிறது.

நீங்கள் OK என்றிருக்கும் விகிதத்துக்குள் இருந்தால், keyboard மற்றும் mouse-லிருந்து கையை எடுங்கள்......., வலது கையை மேலே தூக்குங்கள்......., அப்படியே பின்புறமாக கொண்டு செல்லுங்கள்......., அப்படியே உங்கள் முதுகில் மூன்று முறை தட்டிக்கொண்டு சத்தமாக சொல்லுங்கள்...... "Well done".

சரி Over weight என்று இருப்பவர்கள் எல்லாம்?....ஒன்றும் குடிமுழுகிப்போய்விடவில்லை. இப்போது பிரச்சினை எதுவென்று உணரத்தொடங்கிவிட்டீர்கள். அதுவே பாதி வெற்றி தான்.

Fat & Very Fat என்று இருக்கும் எடைக்குள் இருப்பவர்கள்.........this is the high time. நீங்கள் உடல் ஆரோக்கியத்தின் மேல் கவனம் செலுத்த வேண்டிய கட்டாயத்தில் இருக்கின்றீர்கள்.

இதற்கு இரண்டு பதிவுகளுக்கு முன்னால் எப்படி சிறிய அளவில் உடற்பயிற்சிகளை ஆரம்பிப்பது என்று பார்த்தோம். அனைவருக்கும் KISS பிடிக்கும் இல்லையா?... அதாவது Keep It Short & Simple....:-) ... சிறிய அளவிலான உடற்பயிற்சிகளை தொடர்ந்து செய்வது மனதுக்கு தன்னம்பிக்கையை கொடுக்கின்றது. அந்த தன்னம்பிக்கை நம்மை அடுத்த கட்டத்திற்கு எடுத்துச்செல்லும்.

சுறுசுறுப்பான வாழ்க்கை நமக்கு,

-நல்ல உடல்வாகு
-அதிக தெம்பு மற்றும் உற்சாகம்
-அதனால் நல்ல சுய நம்பிக்கை.
-அதனால் வாழ்க்கையில் வெற்றிக்கு தேவையான மற்றவை எல்லாமும்......

இப்போது முதலிருந்து வருவோம். முதல் பகுதியில் இயந்திர வாழ்க்கை பற்றியும் அது பற்றிய ஒரு அறிதல் பற்றியும் பார்த்தோம். பின்பு வாழ்க்கையில் வெற்றிக்கான வெவ்வேறு புத்தகங்களில் கொடுக்கப்பட்டவைகளின் சாராம்சத்தைப்பார்த்தோம்.அடுத்த பதிவில் எதிலிருந்து ஆரம்பிப்பது என்று சிறிய அளவிலான உடற்பயிற்சிகள் பற்றி பார்த்தோம். அதற்குப்பிறகு சீரான உணவு பற்றியும் ஆரோக்கியமான உணவுப்பழக்கங்களைப்பற்றியும் பார்த்தோம்.

நான் முன்பே சொன்னபடி, இதில் நமக்கு தெரியாத விஷயங்கள் எதுவும் இல்லை. இந்த தொடரின் நோக்கம், தெரிந்த விஷயங்களைக்கொண்டே எளிதான ஒரு ஆரம்பித்தலுக்கான ஒரு தூண்டுதலை ஏற்படுத்துவது தான்.

(தொடரும்)

சீரான உணவு - you are what you eat - Part 4

2005-08-13T20:48:00.000+01:00

போன பதிவில் எளிய உடற்பயிற்சிகளுக்கு எப்படி தயாராவது என்று பார்த்தோம். இந்த பதிவில் ஆரோக்கியமான உணவுப்பயிற்சி முறைகளைப்பற்றி பார்க்கலாம்.

நான் முன்பே சொன்னபடி இதில் நமக்கு தெரியாத விஷயங்கள் எதுவும் இல்லை. சில விஷயங்களை திரும்ப திரும்ப படிப்பது மனதில் ஆழமாக பதியும்.

முதலில் இதயத்தைப்பற்றி, இதயம் நமது உடம்புக்குள் டிக்கிகொண்டு இருக்கும் ஒரு பம்ப். அது வாரத்தில் ஏழு நாட்களும், ஒரு நாளில் 24 மணி நேரமும் தொடர்ந்து ரத்தத்தை உடம்புக்குள் ஓடச்செய்து கொண்டு இருக்கிறது. அதற்குப்பதிலாக அது எதிர்பார்ப்பதெல்லாம் குறைந்த அளவிலான தொடர்ந்த பராமரிப்பு தான்.

இதயத்தை சரியாக பராமரிக்க,

1) புகைபிடிக்கும் பழக்கத்திலிருந்து முற்றிலும் விடுபடுதல்,
2) நல்ல ஆரோக்கியமான உணவுப்பழக்கம்
3) சீரான தேகப்பயிற்சி
4) உடம்பின் எடையை கட்டுக்குள் வைத்துக்கொள்ளல்.
5) குடிப்பழக்கத்திலிருந்து விடுபடுதல். முடியாவிட்டால், கட்டுப்பாடுள்ள குடிப்பழக்கம்.

நமது இதயத்தை ஆரோக்கியமாக வைத்துக்கொள்ள இவற்றைவிட்டால் வேறு மேஜிக் எதுவும் இல்லை. இன்னும் சொல்லப்போனால், இப்போது ஆரோக்கியமாக வைத்துக்கொண்டால் எதிர்காலத்தில் பிரச்சினைகளை தவிர்க்கலாம்.எனக்கு இதயத்தில் எந்த வலிக்கான அறிகுறியும் இல்லை அதனால் நான் ஆரோக்கியமாக இருக்கிறேன் என்று நம்மை நாமே ஏமாற்றிக்கொள்ள வேண்டாம். வலிதான் பிரச்சினைகளுக்கான ஒரே அறிகுறி என்பது அறியாமை.

முதலில் சீரான உணவுப்பழக்கத்தைப்பற்றி,

ஆரோக்கியமான உணவுப்பழக்கம் என்பது உங்களுக்கு பிடித்த உணவு வகைகளை விட்டுவிடச்சொல்வதல்ல. ஆனால் எவ்வளவு தின்னலாம் என்பதைப்பற்றியது. பெரும்பாலோர் டயட் என்றால் வெறும் பழங்களையும், காய்கறிகளையும் தின்பது தான் என்று தவறாக எண்ணிக்கொண்டு இருக்கிறார்கள். நமது உடம்பு எதிர்பார்ப்பதெல்லாம் வித்தியாசமுள்ள சீரான உணவுகள் தான்.

சீரான உணவு என்றால் என்ன?

எளிதாக புரிந்து கொள்ள நமது உணவுகளை ஐந்து வகைகளாக பிரித்துக்கொள்ளலாம். அதற்கு அருகில் அது எவ்வளவு தேவைப்படுகிறது என்பது சதவீதத்தில்,

1) பழங்கள் மற்றும் காய்கறிகள் - 35%
2) அரிசி,கோதுமை,ப்ரட் மற்றும் கிழங்கு வகைகள் -30%
3) பால் சம்பந்தப்பட்ட உணவுப்பொருள்கள் -15%
4) கொழுப்புசத்து மிகுந்த பொருள்கள் -5%
5) மீன், இறைச்சி அல்லது பயறுவகைகள் - 15%

நீங்கள் உங்கள் உணவுப்பழக்கத்தை முற்றிலும் இன்றே இப்போதே மாற்றிக்கொள்ள வேண்டும் என்பது இல்லை. ஆனால் இன்றிலிருந்து எளிதான சிறிய மாற்றங்களை ஏற்படுத்திப்பாருங்கள். உங்களுக்கே வித்தியாசம் தெரியும்.

கீழ்க்கண்டவற்றை முயற்சித்துப்பாருங்களேன்.
- ஒருநாளைக்கு எவ்வளவு முடியுமோ அவ்வளவு நீர் அருந்துதல்.
- அதிக நார்ச்சத்து உள்ள உணவுகள் மிகவும் ஆரோக்கியமானவை.
- வசதிக்கு தகுந்தது போல் எவ்வளவு பழங்கள் அல்லது பழரசங்கள் முடியுமோ அவ்வளவு.
- உணவை எண்ணையில் வறுத்து உண்பதற்கு பதிலாக அவித்து உண்ணுதல்.
- மீன் உடம்புக்கு நல்லது. இறைச்சிக்கு பதிலாக மீன் அதிகமாக பயன்படுத்தலாம்.
- சக்கரையை குறைத்துக்கோள்ளல் (சக்கரையை சிறிதாக குறைத்துக்கொண்டால் நமக்கு முதல் sip-ல் மட்டும் தான் வித்தியாசத்தை உணர்வோம் அப்புறம் தெரியாது)
- உப்பை குறைத்துக்கொள்ளுதல்.

சீரான உணவு மற்றும் அல்ல, சீரான உணவை எவ்வளவு உண்கிறோம் என்பது மிகவும் முக்கியம். அதை எப்படி கண்டு பிடிப்பது? அடுத்த பாகத்தில் பார்ப்போம்.

(தொடரும்)

எது முக்கியம்? எப்படி ஆரம்பிப்பது? - Part 3

2005-08-11T14:39:00.000+01:00

போன பதிவில் சுய முன்னேற்ற நூல்களின் சாராம்சத்தை பார்த்தோம். மேலும் அவற்றை நடைமுறைப்படுத்த முடியாமையில் நாம் கற்பிக்கும் காரணங்களையும் பார்த்தோம்.

எல்லாம் தெரியும் நமக்கு. ஆனால் எதிலிருந்து ஆரம்பிப்பது?
அப்போதெல்லாம் கம்ப்யூட்டர் கற்பிக்க மனிதனின் உடற்கூறுகளை உதாரணமாக காட்டுவார்கள். இப்போது எதிலிருந்து ஆரம்பிப்பது என்று விளக்க நாம் கம்ப்யூட்டர் பாகங்களை உதாரணமாக எடுத்துக்கொள்ளலாம்.

ஒரு நல்ல கம்ப்யூட்டரை எவை உருவாக்குகின்றன.

1) நல்ல specification உள்ள hardware.
2) நல்ல processor
2) நல்ல ஒரு operating system.
3) நல்ல softwares
4) நல்ல bandwidth உள்ள internet connection.

இதுவும் எல்லோருக்கும் தெரிந்தது தானே!!. இங்கு disclaimer எல்லோருக்கும் எல்லாமும் தெரியும். எனக்கென்னவோ ஒரு ideal மனிதனை அடையாளமாக எடுத்துக்கொண்டு தான் கம்ப்யூட்டரையே உருவாக்கியிருக்கிறார்கள் என்று தோன்றுகிறது.

அதன் படி பார்த்தால், நமக்கு மிகவும் முக்கியமானது, ஆரோக்கியமான உடல்.
துரதிஷ்ட வசமாக கம்ப்யூட்டரை upgrade செய்வது போல் உடல் பாகங்களை upgrade செய்ய இயலாது :-)

எனவே, இருக்கும் உடலை ஆரோக்கியமாக வைத்துக்கொள்வது முக்கியமாகிவிட்டது.
எப்படி ஆரோக்கியமாக வைத்துக்கொள்வது?

1) நல்ல உணவுப்பழக்கம்
2) உடற்பயிற்சி.
3) நல்ல தூக்கம்.
4. ஏதாவது ஒரு விளையாட்டில் நம்மை தொடர்ந்து ஈடுபடுத்திக்கொள்ளல்.

இதில் ஒன்று கவனித்தீர்கள் என்றால், நல்ல மன உறுதி இருந்தால் தான் இவற்றை தொடர்ந்து செய்ய இயலும். ஆனால் மனம் உறுதிப்படுவதற்கு நல்ல ஆரோக்கியம் அவசியம். ஆரோக்கியமான உடல் இருந்தால் தான் ஆரோக்கியமாக சிந்திக்க முடியும். எனவே மனப்பயிற்சி, உடல் பயிற்சி இரண்டிற்குமான ஒரு balance மிகவும் முக்கியம்..

உடற்பயிற்சி என்றால், ஒன்றும் பெரிதாக உடற்பயிற்சிக்கூடத்திற்க்கு போய் தான் செய்யவேண்டும் என்ற கட்டாயம் இல்லை.

-பக்கத்திலிருக்கும் கடைக்கு நடந்து போய் வரலாம்.
-அலுவலகம் நடக்கும் தூரத்திலிருந்தால் நடந்து போய் வரலாம். சற்று தூரத்தில் இருந்தால் சைக்கிளில் செல்லலாம்.
-lift உபயோகிக்காமல், படியில் நடந்தேறலாம்.
-நன்றாக நிமிர்ந்து உட்கார்ந்தல் நடத்தல் கூட ஒருவகையில் உடற்பயிற்சி தான். நாம் உடலில் ரத்த ஓட்டம் அதிகரிக்கிறது.
-அலுவலகத்தில் இருக்கையில் அமர்ந்து கொண்டே செய்யக்கூடிய stretching உடற்பயிற்சிகள் நிறைய இருக்கின்றன.

இதற்கு அடுத்த லெவலில், நமது உடலில் உள்ள அனைத்து பாகங்களுக்கும் அசைவு கொடுக்கும் அற்புதமான ஒரு உடற்பயிற்சி - 'சூரிய நமஸ்கரணம்'. இது ஒரு உடற்பயிற்சி மட்டுமல்ல, சிறந்த மூச்சுப்பயிற்சியும் கூட...கற்றுக்கொள்வதும் மிகவும் எளிது.

மேலே உள்ள படத்தில் சூரிய நமஸ்கரணத்தின் அனைத்து நிலைகளும் தெளிவாக விளக்கப்பட்டுள்ளன. சிலர் சொல்லுவார்கள், யோகாவை முறையாகத்தான் கற்றுக்கொள்ள வேண்டும் என்று. அது எந்த அளவுக்கு சரி என்று தெரியவில்லை. ஆனால் சூர்ய நமஸ்கரணம் ஒரு எளிய ஒன்று.ஒரு முறைதான் முயன்று பார்க்கலாமே !!!

(தொடரும்)

சுய முன்னேற்ற நூல்களின் சாராம்சம் - Part 2

2005-08-10T23:16:00.000+01:00

நாம் படிக்கும் பெரும்பாலான சுய முன்னேற்றம் சம்பந்தமான புத்தகங்களில் கொடுத்திருப்பவற்றின் சாராம்சத்தை வகைப்படுத்தி பட்டியலிடலாம் என்று நினைத்தேன்.

சுயம் சம்பந்தப்பட்டவை:
1) தன்னம்பிக்கை
2) முடிவெடுக்கும் திறமை.
3) தெளிவான சிந்தனை.
4) வாழ்க்கையில் குறிக்கோள்.
5) திட்டமிடல்.
6) மனோதைரியம்.
7) ஆக்கபூர்வமான சிந்தனை.
8) assertiveness (மன உறுதி)
9) வருமுன் காத்தல்.
10) பொறுப்பேற்றுக்கொள்ளுதல்.
11) ஆரோக்கியமான உடல்
12) ஒழுக்கம்.
13) கடுமையான உழைப்பு

சமூகம் சார்ந்தவை:
1) இனிமையான பேச்சு
2) வாக்குத்தவறாமை.
3) நம்பகத்தன்மை.
4) பிறர் சொல்லுதை கேட்கும் தன்மை.
5) உதவும் தன்மை.
6) leadership skills.
7) நேர்மை.
8) நேரந்தவறாமை
9) அடுத்தவரின் சுதந்திரத்தை மதித்தல்.
10) நகைச்சுவை உணர்ச்சி
11) பிறருக்கு உண்மையாக இருத்தல்.
12) கடமை உணர்ச்சி

உத்திகள்(techniques):
1) தியானம்
2) யோகா
3) உடற்பயிற்சி
4) நம்மை நாமே motivate பண்ணிக்கொள்ள உதவும் auto suggestion techniques.
5) பேச்சுத்திறமையை வளர்த்துக்கொள்ள உதவும் உத்திகள்.
6) நேரத்தை நிர்வாகித்தல் தொடர்பான உத்திகள்.
7) Prayer(இது ஒருவிதமான goal setting technique)

கேள்விகள்:

மேலே கொடுத்திருப்பவற்றில் நமக்கு எதைப்பற்றி தெரியாது? சொல்லுங்கள். நமக்கு எல்லாவற்றைப்பற்றியும் தெரியும். ஆனால் நம்மால் எல்லாவற்றையும் நடைமுறைப்படுத்திவிட முடிவதில்லையே ஏன்? நடைமுறைப்படுத்த ஆசை ஆனால் எது முக்கியம் என்று தெரியவில்லையே ஏன்?... சிலவற்றையாவது நடைமுறைப்படுத்த சுத்தமாக நேரமே கிடைப்பதில்லையே ஏன்? சிலவற்றை சிலநாட்களுக்கு நடைமுறைப்படுத்தினாலும் அவற்றை தொடர்ந்து செய்ய முடிவதில்லையே ஏன்? எல்லாவற்றையும் நாம் நடைமுறைப்படுத்துவதாக நினைத்தாலும் சுற்றியிருப்பவர்கள் சரியில்லாததால் எல்லாம் வீணென்று நாம் நினைப்பது ஏன்?

so.. பிரச்சினை இருப்பது இனிமையான வாழ்க்கை எப்படி வாழ்வது என்பது தெரியாமல் இருப்பதல்ல !!!!. அவற்றை நடைமுறைப்படுத்தமுடியாமையில் நாம் காரணம் கற்பித்தலில் இருக்கிறது. சரி எப்படி நடைமுறைப்படுத்துவது என்று கேட்கிறீர்களா? கணினி மற்றும் தொலைக்காட்சி இல்லாத தனிமையில் அமருவோம், சிந்திப்போம்.

(தொடரும்)

நயாகரா சிண்ட்ரோம் - ஒரு சீரியஸ் பதிவு - Part 1

2005-08-09T23:16:00.000+01:00

பெங்களூரில் பணி புரிந்து கொண்டு இருந்த போது பல விதமான சுயமுன்னேற்ற பயிற்சி முகாம்களில் கலந்து கொள்வது உண்டு. எந்த பயிற்சி முகாமுக்கு போனாலும் தெரிந்த அதே விஷயங்கள் தான் வெவ்வேறு பரிமாணங்களில் சொல்லப்பட்டன.ஆனால் வாகனங்களை service -க்கு விடுவது போல், நம் மனதையும் அவ்வப்போது புத்துணர்ச்சிப்படுத்திக்கொள்ள இது போன்ற பயிற்சி முகாம்கள் உதவின.

இப்போது சிந்தித்துப்பார்த்தால் நமது வாழ்க்கையில் பெரும்பாலான நேரம், நாம் வாழ்க்கையின் ஓட்டத்திலேயே போய்க்கொண்டு இருக்கிறோம். நிர்வாகவியலில் இதை 'நயாகரா சிண்ட்ரோம்' என்று சொல்வார்கள். ஓடத்தில் அமர்ந்து கொண்டு ஆற்றின் போக்கிலேயே போய்க்கொண்டு இருக்கும் ஒருவன் சிந்தித்தான். 'ஆஹா... எவ்வளவு அருமையாக இருக்கிறது இந்த பயணம், நாம் துடுப்பு போடவே வேண்டியதில்லை' என்று....அப்படியே பயணத்தை ரசித்துக்கொண்டே போய்க்கொண்டு இருந்தான். சற்று நேரம் கழித்து பார்த்தால் தூரத்தில் இருந்து அருவிச்சத்தம் கேட்டது. அப்புறம் தான் அவன் உணர்ந்தான் அவன் ஒரு அருவியின் விளிம்பில் இருப்பதை. நிலைமையை உணர்ந்து ஓடத்தை திருப்புவதற்குள் காலம் கடந்து விட்டது.

இயந்திரத்தனமான இந்த வாழ்க்கையில் அந்த உணர்தல் சாத்தியப்படுவதில்லை. எதுவுமே நிலையில்லாத இந்த வாழ்க்கைச்சூழ்நிலையில் ஒருவிதமான feel of insecurity -யில் எதிர்காலத்தை பற்றி சிந்தித்து பார்க்கவோ, நிகழ்காலத்தில் நடப்பதை ஆராய்ந்து பார்க்கவே பயமாக உள்ளது.

அப்படிப்பட்ட சூழ்நிலையில் தான் நமக்கு தெளிவை ஏற்படுத்த புற உதவி தேவைப்படுகின்றது. புற உதவி கீழ்க்கண்டவற்றின் மூலமாக சாத்தியப்படுகிறது.

1) நல்ல வாழ்க்கைத்துணை
2) நல்ல மனம் விட்டு பேசக்கூடிய நண்பர்கள் அல்லது உறவினர்கள்.
3) குருவாக அல்லது வழிகாட்டியாக ஏற்றுக்கொண்ட ஒருவர்.
4) நல்ல வாசிப்புகள்.

பொதுவாகவே நமக்கு நமது மட்டத்தில் இருக்கும் ஒருவரிம் இருந்து வரும் அறிவுரைகள் பிடிப்பதில்லை. இதற்குக்காரணம் முதலில் EGO-(Edging God Out). இரண்டாவது நுனிப்புல் மட்டத்தில் எல்லோருக்கும் எல்லாமும் தெரிந்திருப்பது தான். அறிவுரைகள் வெறும் அறிவுரைகளாக இல்லாமல் தெளிவுரைகளாகவும், பகிர்ந்துரைகளாகவும் இருந்தால் அவைகள் நம் எல்லோராலும் ஏற்றுக்கொள்ளப்படுகின்றன.

நமக்கு தேவைப்படும் புற உதவிகளில் ஒன்றான வாசிப்புகளுக்கு ஏதாக இனி அவ்வப்போது, ஒரு வாசிப்பாளனின் கண்ணோட்டத்தோடு ஒரு தேடலின் பயணத்தைப்பற்றி தொடர்ந்து எழுதலாம் என்றிருக்கிறேன். எப்படி ஆரம்பிப்பது என்று தான் ஒரே குழப்பமாக இருந்தது. இதோ உதவிக்கு அறிஞர் பிளேட்டோ 'ஒரு வேலையில் முக்கியமான பகுதி என்பது அதன் ஆரம்பம் தான்'.

(தொடரும்)

எங்கேயோ பார்த்த ஞாபகம்....

2005-08-08T15:06:00.000+01:00

இது போன்ற படத்தை எங்கேயோ பார்த்த ஞாபகம். :-)))

தெரிந்தால் யாராவது நினைவு படுத்துங்களேன் !!!!!

தொப்பை - ஒரு உலகப்பிரச்சினை.

2005-08-07T00:40:00.000+01:00

இந்தப்பதிவை படிக்கும் யாவரும் இதை வெளிப்படையாக ஒத்துக்கொள்ளமாட்டார்கள், அவர்களுக்கு தொப்பை இருக்கிறதென்று. இது ஒருவிதமான உலகப்பிரச்சினை ஏனென்றால் இது உலகத்தில் தொன்னூறு சதவீதத்திற்க்கும் அதிகமான மக்களுக்கும் உள்ள பொதுப்பிரச்சினை. ஆனால் சாதாரணமாக எடுத்துக்கொள்ளப்பட்ட பிரச்சினை.

முதலில் தொப்பை என்பது இயல்பா அல்லது விதிவிலக்கா? -என்பது தான் பெரும்பாலானோருக்கான சந்தேகமும், சாதகமாக எடுத்துக்கொள்ளக்கூடிய ஒரு சந்தர்ப்பமும் கூட...:-).. நம்முடைய தினசரி வாழ்க்கையில் நாம் சந்திக்கும் அனைவரையும் கவனித்துப்பாருங்கள். பெரும்பாலோருக்கும் இந்தப்பிரச்சினை இருக்கும். என்னைப்பொருத்தவரை 'தொந்தி' என்பது மனித உடலியல் கூற்றுப்படி ஒரு அங்கமாக கருதப்பட வேண்டும். எப்படி வால் மனிதனின் அங்கத்திலிருந்து அகற்றப்பட்டதோ அதே போல்
'தொப்பையும்' மனிதனின் உடல் அங்கங்களில் ஒன்றாக கருதப்பட வேண்டும்.

சரி, தொந்தி மருத்துவர்களின் கூற்றுப்படி ஒரு நோயாகவே இருக்கட்டும், எத்தனை பேர் இதனை ஒற்றுக்கொள்ள தயாராக இருக்கிறீர்கள். எத்தனை பேர் இதனை தவிர்க்க முயற்சி எடுத்திக்கிறீர்கள்? எடுத்திருக்கிறோம்?. அவ்வப்போது தட்டை வயிறு இருப்பவர்களை பார்க்கும்போது நாளை எழுந்து காலையில் ஜாகிங் போக வேண்டும் என்று தோன்றும் வைராக்கியம் மறுநாள் காலையில் எங்கு மாயமாய் போனது என்பது அந்த தொப்பைக்கே வெளிச்சம்.

நம்மூரில் என்னவோ தொப்பை என்பது போலீஸ்காரர்களுக்கு மட்டுமே உரித்தான ஒரு அடையாளமாக திரித்து சொல்லப்பட்டு வருகிறது. இக்கால இளைஙர்களிடம் கேட்டுப்பாருங்கள், பியர் பெல்லி என்பது ஒரு fashion என்றாகி விட்டது.

வழுக்கை தலை இருப்பவர்களுக்கெல்லாம் சங்கம் இருக்கிறது. 'bald is beautiful' என்றெல்லாம் சொல்லிக்கொள்கிறார்கள். தொப்பை-யர்களுக்கென்று ஏதாவது சங்கம் இருக்கிறதா என்று யாருக்காவது சொல்லுங்கள்.

Belly is beautiful !!! இல்லையா??

சானியா மிர்ஸா - இந்தியாவின் நம்பிக்கை நட்சத்திரம்

2005-08-04T00:50:00.000+01:00

(இரண்டு நாட்களுக்கு முன்பு எழுதிய இந்த பதிவு காணாமல் போய் விட்டது :-(( அதனால் திரும்ப...)

சானியா மிர்ஸா... !! கிரிக்கெட் ஜுரத்தில் மற்ற விளையாட்டுக்கள்
அடிபட்டுக்கிடக்கும் ஒரு நாட்டில், தன் திறமையினாலும் வசீகரத்தாலும்
நாட்டின் கவனத்தை தன் பக்கம் திரும்பச்செய்தவர். இது வரை சானியாவின் ஆட்டத்தை நேரிலோ, தொலைகாட்சிகளிலோ பார்த்ததிராத நான், முதன் முதலில் பார்த்தது விம்பிள்டனில் ரஷ்ய வீராங்கனையான ஸ்வெட்லானாவிற்கு எதிரான அவரின் ஆட்டத்தைத்தான். பார்க்கும் போது தான் தெரிந்தது, மீடியாவில் அவர் பற்றிய் வரும் செய்திகள் எதுவும் மிகைப்படுத்தப்பட்டவை இல்லை என்று.

மும்பையில் பிறந்து ஹைதராபாதுக்கு குடியேறிய ஒரு மத்தியத்தர வகுப்புக் குடும்பத்தில் பிறந்த சானியா, முதன் முதலில் டென்னிஸ் மட்டையை கையில் எடுத்தது அவரது ஆறாவது வயதில். பனிரெண்டாவது வயதில் பதினாறு வயதுக்குட்பட்டவர்களுக்கான தேசிய டென்னிஸ் சாம்பியன் பட்டத்தை வென்றார். அப்போது அதிர்டவசமாக அவருக்கு addidas நிறுவனத்திலிருந்து ஸ்பான்சர்ஷிப் கிடைத்தது. 2003-ஆம் ஆண்டு விம்பிள்டன் ஜூனியர் இரட்டையர் பட்டத்தை வென்றார். 2005 ல் இந்த வருட சீசன் ஆரம்பத்தில் ஹைதராபாத் ஓபன் ஏடீபி பட்டத்தை வென்றார்.

இந்த சீசன் ஆரம்பிக்கு முன்பு சானியா உலக டென்னிஸ் தரவரிசையில் 194-வது இடத்தில் இருந்தார். அப்போது, இந்த வருட குறிக்கோள் முதல் ஐம்பது இடத்திற்குள் வருவது என்று சொன்னார். சொன்னபடியே சாதித்துக்காட்டிவிட்டார் இப்போது. நேற்று ரஷ்யாவின் பெட்ரோவாவை வென்றதன் மூலம் முதல் ஐம்பது இடத்துக்குள் வருவது உறுதியாகிவிட்டது.

சானியா அளவுக்கதிகமாக விளம்பரம் தேடிக்கொள்கிறார் என்று சிலர் குற்றம் சாட்டுகின்றனர். நம் கிரிக்கெட் வீரர்களைவிடவா அதிகமாக விளம்பரம் தேடிக்கொள்கிறார்? அப்படியே இருந்தாலும் அதில் என்ன தவறு? அது நிறைய இளம் வீராங்கனைகள் உருவாகுவதற்குத்தான் வழி வகுக்கும்.

சானியா கிராண்ட்ஸ்லாம் பட்டத்தை வெல்லும் நாள் வெகு தொலைவில் இல்லை. அவருடைய ஆட்டத்தை பார்த்தவர்கள் யாரும் இதை பேராசை என்று நிராகரிக்க மாட்டார்கள்..

வாழ்த்துக்கள் சானியா !!!!

ஏ ஆர் ரஹ்மானின் இசை நிகழ்ச்சி அனுபவம்

2005-08-01T22:24:00.000+01:00

முதன் முறையாக லண்டனில் ஒரு இசை நிகழ்ச்சி பார்க்கப்போகிறோம் அதுவும் ஏஆர் ரஹ்மானின் நிகழ்ச்சி என்ற பரவசம் வாரக்கடைசியிலேயே
ஆரம்பித்துவிட்டது. மான்செஸ்டரிலிருந்து இந்த நிகழ்ச்சியை பார்ப்பதற்காக என் டாக்டர் நண்பர்கள் வேறு வந்திருந்தார்கள். ஒரு வழியாக வீட்டிலிருந்து கிழம்பி, நேராக சரவண பவனில் சூடாக இட்லி, தோசை, வடை முடித்துவிட்டு சரியாக ஏழு மணிக்கு அரங்கத்தின் உள்ளே இருந்தோம்.

போனவுடன் முதல் ஆச்சரியம்..., வெம்ப்ளி அரினாவின் பிரம்மாண்டம்.அரங்கத்தின் பின்னாலிருந்து பார்ப்பவர்களுக்கு என்ன தெரியும் என்று ஆச்சரியமாக இருந்தது. அரங்கத்தின் உள்ளேயே பைனாக்குலர் வாடகைக்கு கொடுக்கிறார்கள். பின்னாலிருந்து பார்ப்பவர்களுக்காக பிரம்மாண்டமான திரை வைத்திருக்கிறார்கள். அரங்கம் முழுதும் நிரம்பி இருந்தது ( அரங்கத்தின் கொள்ளளவு 11500 பேர்).

கூடவே ஏமாற்றமும்..., முப்பரிமாண நிகழ்ச்சிக்காக மும்பையிலிருந்து வரவேண்டிய உபகரணங்கள் வராத காரணத்தால் நிகழ்ச்சிக்கு முப்பரிமாண கண்ணாடிகள் வழங்கப்படவில்லை. நிகழ்ச்சி அமைப்பாளர்கள் இதற்காக வருத்தம் தெரிவித்து ஒரு கடிதம் கொடுத்தார்கள். மும்பை மழை,வெள்ளத்தை காரணமாக சொன்னதால் யாரும் பெரிதாக எடுத்துக்கொள்ளவில்லை.

வந்திருந்தவர்களில் வட இந்தியர்கள், தென்னிந்தியர்கள் மற்றும் ஈழத்தமிழர்கள் சம அளவில் இருந்தனர். வேறு எந்த நிகழ்ச்சிக்கும் இப்படிப்பட்ட ஒரு mix-ஐ பார்க்க முடியாது. ஏ ஆர் ரகுமானுக்கு இதற்காக நன்றி சொல்ல வேண்டும். என் பக்கத்தில் உட்கார்ந்திருந்தவர்கள் பிரான்சு நாட்டிலிருந்து இந்த நிகழ்ச்சியை பார்ப்பதற்காக வந்திருந்தார்கள்.

ஏழு மணிக்கு ஆரம்பிக்க வேண்டிய நிகழ்ச்சி, ஏழரை மணிக்கு ஆரம்பித்தது. ஏ ஆர் ரஹ்மான் அட்டகாசமாக அறிமுகப்படுத்தப்பட்டார். எப்போதும் கூச்ச சுபாவத்துடன் இருக்கும் ரஹ்மான் இப்போதெல்லாம் நிகழ்ச்சிகளில் நன்றாக பேச ஆரம்பித்து விட்டார். முதல் நான்கு பாடல்கள் அனைத்தும் இந்திப்பாடல்கள் அதுவும் ரஹ்மானின் புதிய இந்திப்பாடல்கள். அதுவும் நாங்கள் ஒருமுறையும் கேட்டிறாத இந்திப்பாடல்கள். அடடா !! ரஹ்மான் கவுத்துட்டார்-னு கவலையோடு உட்கார்ந்திருந்தோம். அப்புறம் வந்தார்கள் ஹரிஹரனும், சங்கர் மகாதேவனும். மாறி மாறி தமிழ்ப்பாடல்கள் வந்தன. ஒவ்வொரு முறை தமிழ் பாடல்கள் பாடியபோதும் அரங்கமே அதிர்ந்தது. 'அரபிக்கடலோரம்' பாட்டு வந்தபோது அரங்கத்திலிருந்த அனைவரும் எழுந்து ஆட ஆரம்பித்துவிட்டனர். பாம்பே தீம் புல்லாங்குழல் பாட்டு வந்த போது அனுபவித்து ரசித்தது. ட்ரம்ஸ் சிவமணி தனி ஆவர்த்தனத்தின் போது அனைவரையும் ஆட வைத்தார். 3 மணி நேரம் எப்படித்தான் போனது என்றே தெரியவில்லை. கடைசியாக வந்தே மாதரம் பாட்டு ரஹ்மான் பாடியபோது ஒட்டுமொத்த அரங்கமும் சேர்ந்து பாடியது மெய்சிலிர்க்க வைத்தது. மொத்தத்தில் மறக்க முடியாத மூன்று மணி நேரங்கள்.

லண்டன் வெம்ப்ளியில் ஏ ஆர் ரஹ்மானின் இசை நிகழ்ச்சி.

2005-07-27T21:53:00.000+01:00

வரும் சனிக்கிழமை(30 ஜூலை) லண்டன் வெம்ப்ளி அரினாவில் ஏ ஆர் ரஹ்மானின் முப்பரிமாண(?) இசை நிகழ்ச்சி நடைபெறவிருக்கிறது. நுழைவுச்சீட்டு மற்றும் மேலும் விவரங்களுக்கு இங்கே கிளிக்கவும்.

உலக வரலாற்றிலேயே முதன் முறையாக ஒரு முப்பரிமாண இசை நிகழ்ச்சி நடைபெறவிருக்கிறது என்கிறார்கள். பார்வையாளர்கள் அனைவருக்கும் முப்பரிமாண கண்ணாடி வேறு கொடுக்கிறார்களாம். அதற்க்கு மேல் விவரம் இல்லை.

தலேர் மெஹந்தி, ஹரிஹரன்,சங்கர் மகாதேவன், அல்கா யக்னிக், சாதனா ஸ்ர்கம் மற்றும் பலர் கலந்து கொள்கிறார்கள்.

Getting bit excited.....பார்த்து முடித்துவிட்டு எப்படி இருந்தது என்று எழுதுகிறேன்.

நம்பிக்கை - கவிதைப்போட்டி

2005-07-26T08:47:00.000+01:00

இது என் முதல் கவிதை முயற்சி. வெங்கிட்டுவின் கவிதைப்போட்டிக்காக எழுதியது.
கணேஷ், பாசிட்டிவ் ராமா,மதுமிதா,அருண்,பினாத்தல் சுரேஷ் அனைவருடைய inspiration-க்கும் நன்றி.

நம்பிக்கை

வாழ்க்கைச்சுழலின்
ஆதாரச் சக்கரம்.
வாழ்க்கை வளமாக
எளியவொரு சூத்திரம்.
நம்மேல் நாம் வைத்தால்
வளரும் நம் சுயம்.
பிறர்மேல் நாம் வைப்போம்
வளரட்டும் சமுதாயம்.

அன்னியன்... ஒரு அன்னப்பறவை analysis

2005-07-24T22:52:00.000+01:00

முதலில் rajni ramki, சின்னவன், kajni kamki :-)அனைவருக்கும் நன்றி...

மைனஸ் பாயிண்ட்:

பிளஸ் பாயிண்ட்ஸ்:

1. தனி மனித ஒழுக்கம் முக்கியம்.
2. அதிகாரிகளை, அரசாங்கத்தை மற்றதையும் குறை சொல்லாதீர்கள். (நீங்கள் தான் நேரடியாகவும் மறைமுகமாகவும் அனைத்திற்கும் பொறுப்பு)
3. பணம் கொடுத்து திரையரங்கத்தில் உட்காந்திருக்கும் படித்தவர்கள், பாமரர்கள் அனைவரையும் பொழுது போக்குப்படுத்துவது.
4. கருட புராணம் பற்றி மக்களுக்கு தெரியப்படுத்தியது.(அது உண்மையா?)
5. விக்ரமின் அருமையான நடிப்பு.

நூறு குறைகள் இருந்தாலும் பரவாயில்லை, ஒருசில நல்லவைகள் இருந்தால் அவை பாராட்டப்பட வேண்டியவை (copied from Mahatma Gandhi)
நல்லதைத்தான்(கொஞ்சமோ!! நிறையயோ!! இருந்தாலும்) பாராட்டி ஒரு வார்த்தை சொல்லிட்டு போறதுல என்ன கொறஞ்சுட போறதுடுங்க?????

இந்தியாவின் அருமை அமெரிக்காவிற்கு இப்போது புரிகிறது.

2005-07-23T20:50:00.000+01:00

கடைசியில் இந்தியா போன்ற ஒரு சமத்துவத்தை விரும்பும் நாட்டின் அருமையை அமெரிக்க ஊடகங்கள் உணரத்தொடங்கி உள்ளன.

இன்று வாஷிங்டன் டைம்ஸில் வந்துள்ள கட்டுரையின் சுட்டி.

கட்டுரையில் இருந்து சில வரிகள்,

1) இந்தியாவின் மத ஒருமைப்பாட்டுக்கு ஒரு உதாரணம், இந்தியாவின் பிரதமர் ஒரு சீக்கியர், ஜனாதிபதி ஒரு இஸ்லாமியர், ஆளும் கட்சியின் தலைவர் ஒரு கிரிஸ்துவர், அவரது பிள்ளைகள் இந்துக்கள், முன்னாள் துணை ஜனாதிபதி ஒரு தலித்.
2) உலகிலேயே இஸ்லாமியர்கள் அதிகமாக உள்ள நாடு இந்தோனேசியாவுக்கு அடுத்தபடி இந்தியா தான், இருந்தாலும் இந்திய இஸ்லாமியர்கள் இது வரைக்கும் எந்தவிதமான தீவிரவாத நடவடிக்கைகளிலும் ஈடுபட்டதில்லை.
3) நீங்களே மற்றதை படித்துக்கொள்ளுங்கள் (சில சமயங்களில் மொழி பெயர்ப்பது கருத்தை சிதைத்து விடுகிறது)

அமெரிக்காவுக்கு இப்போதாவது நம் அருமை புரிந்ததே அது வரைக்கும் மகிழ்ச்சி. (அவர்களுக்கு புரிந்து இருக்காவிட்டாலும் நமக்கு கவலை இல்லை.. அது வேறு விஷயம்)

இங்கிலாந்தில் தற்போதைய நிலவரம் - ஒரு அலசல்

2005-07-22T23:56:00.000+01:00

லண்டனில் நடந்த இரண்டாவது குண்டுவெடிப்பு நிகழ்சிக்கு பிறகு இங்கு நிலவரம் மற்றும் இங்கிலாந்து மக்களின் மன நிலை எப்படி இருக்கிறது என்பது பற்றியான என்னுடைய பதிவு.

ஒட்டு மொத்த நிலவரம்:
இரண்டு வாரத்துக்கு முன்பு, நான்கு குண்டு வெடிப்புகள், 54 பேர் பலி, நூற்றுக்கணக்கணக்கானோர் காயம். இப்போது அதேபோல் நான்கு குண்டு வெடிப்பு முயற்சிகள், அதிர்ஷ்டவசமாக முயற்சிகள் தோல்வி, தோல்வியடைந்த முயற்சிகள் காரணமாக இங்குள்ள காவல் துறையினருக்கு அதிகமான தடயங்கள். குண்டுவெடிப்பு முயற்சியில் சம்பந்தப்பட்டவனை பிடிக்கும் முயற்சியில் ஒருவன் சுட்டுக்கொலை. நிராயுத பாணியாக இருந்திருந்தும்(அதிகாரபூர்வமற்ற செய்தி). இங்கிருக்கும் இஸ்லாமியர்களுக்கு தனிமனித சுதந்திரம் மற்றும் நாளை நம்மையும் இதேபோல் சுட்டுக்கொள்ள மாட்டார்கள் என்பது என்ன நிச்சயம் என்பது பற்றிய பயம்.
இது தான் இப்போதைய நிலவரம்.

லண்டனில் நிலவரம்:
லண்டனில், நான் பார்த்தவரை, நான் கேள்விப்பட்டவரை, இயல்பு வாழ்க்கை பெருமளவில் பாதிக்கப்படவில்லை. இரண்டு மூன்று பாதாள ரயில் போக்குவரத்து பாதிக்கப்பட்டுள்ளது. லண்டனில் வசிக்கும் அனைவரும் அவரவர் தினசரி பணிகளை புரிந்து கொண்டுதான் இருக்கிறார்கள். என்ன ஒன்று!! எல்லோரும் எல்லோரையும் ஒரு சந்தேக கண்ணோட்டத்தோடு தான் பார்த்து கொண்டு ரயிலில் மற்றும் பேருந்தில் பிரயாணிக்கிறார்கள். முடிந்தவரை சுமைகள் இல்லாமல் பிரயாணிக்கிறார்கள். லண்டனில் சுற்றுலாவினால் வரும் வருமானம் பெருமளவில் பாதிக்கப்பட்டுள்ளது.

ஊடகங்களின் பிரதிபலிப்பு:
எப்போதும் போல ஊடகங்கள் எல்லாவற்றையுமே மிகைப்படுத்திதான் பிரதிபலிக்கும்.(அவர்களுக்கு அவர்களுடைய circulation பற்றிய கவலை). அவை அனைத்தும் இஸ்லாமிய மக்களை தனிமைபடுத்துவது போலவே செய்திகளை வெளியிடுகின்றன. முதலில் தீவிரவாதி பிரிட்டிஷ் குடிமகன் என்றன, பின்பு பாகிஸ்தானை பூர்வீகமாக கொண்ட பிரிட்டிஷ் குடிமகன் என்றன. இப்போது பாகிஸ்தானி என்றே குறிப்பிடுகின்றன.

டோனி ப்ளேரின் நிலை:ஒரு புறம் தொடர் தீவிரவாத குண்டுவெடிப்புகளை சமாளித்தாக வேண்டிய சூழ்நிலை. மற்றொரு புறம், ஈராக் போரினால் தான் இந்த நிலை ஏற்பட்டது என்று நிறைய பேர் குற்றம் சாட்டுகிறார்கள். சமாளித்தாக வேண்டும். சமாளித்து விடுவார். (அதுதான் அரசியல் வாதிகளுக்கு கைவந்த கலை ஆயிற்றே!)

இஸ்லாமியர்களின் மனநிலை:
யாரோ ஒரு தீவிரவாத மனப்பான்மையுடைய ஒரு கூட்டம் செய்த தவறுக்கு ஒட்டு மொத்த இஸ்லாமிய சமுதாயம் ஏன் பொறுப்பேற்க வேண்டும்? அவர்கள் ஏன் தனிமைப்படுத்தப்பட வேண்டும்? - என்பது தான் அவர்களின் கேள்வி, ஆதங்கம்.

பாகிஸ்தான் அரசாங்கத்தின் நிலைப்பாடு:
நான்கு தீவிரவாதிகளில் மூன்று பேர், பாகிஸ்தானை பூர்வீகமாக கோண்டவர்கள் மற்றும் அனைவரும் பாகிஸ்தானில் உள்ள மதராஸாக்களில் இஸ்லாம் பயிலுவதற்க்காக சென்றிருந்தவர்கள் என்பதால் பாகிஸ்தான் அரசாங்கத்திற்கு நெருக்கடி. அதிபர் முஸராப் சில அவசர சட்டங்களை இயற்றும்படி ஆயிற்று. அதே சமயத்தில் அவர் இங்கிலாந்து அரசாங்கத்துக்கு கீழ்க்கண்ட கேள்விகளை எழுப்புகிறார். தீவிரவாதிகள் அனைவரும் பிரிட்டிஷ் குடிமகன்கள். அதில் ஒருவன் ஆப்பிரிக்காவை பூர்வீகமாக கொண்டவன். இங்கிலாந்து தீவிரவாதத்தை தடுக்க என்ன நடவடிக்கை எடுத்துள்ளது? கட்ந்த காலத்தில் எத்தனை தீவிரவாத இயக்கங்களை தடை செய்துள்ளது?....(நியாயமான கேள்வி).

இங்கிலாந்தில் வசிக்கும் இந்தியர்களின் நிலை:
இங்குள்ள ஊடகங்களுக்கு இந்தியர்களோ அல்லது பாகிஸ்தானியர்களோ அல்லது பங்களாதேசிகளோ.. அனைவரும் ஏசியன்கள் தான். சில இடங்களில் சில பேர் 'பாகி' என்று தான் அனைவரையும் அழைப்பார்கள். பாகிஸ்தானிகளுக்கு எதிராக எந்த ஒரு செயல்பாடும் இங்கு வசிக்கும் இந்தியர்களையும் பாதிக்கும். ஒட்டு மொத்தத்தில் இதனால் பெரிதும் பாதிக்கப்படப்போவது நம் இந்தியர்கள் தான்.(தீவிரவாத் சம்பவங்களுக்கு எந்த வித moral responsibility-யும் இல்லையென்றாலும்..... ) ஆனால் இந்த அரசாங்கம் அந்த நிலையை ஏற்பட விடாது. நம் இந்தியர்கள் பாதிக்கப்பட்டால் இங்கு ஒட்டு மொத்த இயல்பு வாழ்க்கையே ஸ்தம்பித்து விடும். அந்த அளவுக்கு மருத்துவர்களும், பொறியியல் வல்லுனர்களும், மற்ற தொழில் துறையினரும் சமுதாயத்தில் கலந்து இருக்கிறார்கள். (மேலும் Curry food சாப்பிடாமல் இங்கிலாந்து மக்களுக்கு உயிர் வாழ முடியாது. :-)) )

இது தான் இப்போதைய ஒட்டு மொத்த நிலவரம். இதில் யாரையும் யாரும் குறை சொல்ல முடியாது. நல்லதே நடக்கும் என்று நம்புவோம்.

பேஜ் 3

2005-07-22T12:39:00.000+01:00

இதைப்பற்றி யாரும் எழுதியிருக்கிறீர்களா என்று தெரியவில்லை. நேற்றுத்தான் எனக்கு இந்தப் படம் பார்க்கக்கிடைத்தது. அருமையான படம். இந்தப்படத்திற்கு சிறந்த படத்துக்கான தேசிய விருது கிடைத்ததில் எந்த ஆச்சரியமும் இல்லை.

ஒருவரியில் கதை, முன்னணி தினசரியின் மூன்றாம் பக்கத்தில் வரும் பிரபலங்களைப்பற்றிய செய்திகளை தொகுத்து வழங்கும் ஒரு நிருபர், பார்க்க நேரும் பிரபலங்களின் நிஜ ரூப வக்கிர முகங்களைப்பற்றியது.

இயக்குனருக்கு அருமையாக கதை சொல்லதெரிந்திருக்கிறது. மேல் தர வகுப்பில் உள்ள அனைத்து அவலங்களையும் கொஞ்சம் கூட தயக்கம் இல்லாமல் சொல்லியிருக்கிறார் இயக்குனர்.

கொங்கனா சென்னின் இதற்கு முந்திய படமான மிஸ்டர் அண்ட் மிஸர்ஸ் அய்யர் பார்த்திருப்பவர்களுக்கு அவருடைய நடிப்பைப்பற்றி தெரிந்து இருக்கும். மிகைப்படுத்தப்படாத இயல்பான நடிப்பு.

கலாச்சாரம் என்ற மாயை எல்லாம் மத்திய தர வகுப்பு மக்களுக்கு மட்டும் தான் என்று இந்தப்படம் பார்த்த பிறகு உறுதிப்படுகிறது.

ப்ளாக், பேஜ்3... இது போன்ற இந்திப்படங்கள் வரவேற்கத்தக்க நல்ல முயற்சிகள்.

தமிழ் வலைப்பதிவுகள் மட்டும் இருந்திருக்காவிட்டால்

2005-07-19T21:28:00.000+01:00

தமிழில் வலைப்பதிவுகள் மட்டும் இல்லாவிட்டால் நான் என் நேரத்தை எப்படி செலவழித்துக்கொண்டு இருந்திருப்பேன் என்று சிந்தித்துக்கொண்டு இருந்தேன்.

முதலில், எனக்கு கிடைக்கும் நேரத்தைப்பற்றி,
1) அலுவலகத்தில் உருப்படியாக ஒரு 4 மணி நேரம் வேலை செய்தாலே ஆஹா!! ஒஹோ !! என்கிறார்கள். (வலைமேய 4 மணி நேரம் அலுவலகத்தில்)
2) 5 மணிக்கு மேல் அலுவலகத்தில் இருந்தால் உள்ளே வைத்து பூட்டி விடுவார்கள். எனவே 5 மணிக்கு அலுவலகத்தை விட்டு கிளம்பியே ஆக வேண்டும்.
3) வீட்டிலிருந்து அலுவலகம் 5 நிமிட நடையில்.(வீட்டுக்கு வந்தவுடன் மேலும் 4 மணி நேரம் கிடைக்கிறது)

மொத்தம் ஒரு நாளைக்கு 8 மணி நேரம் வலை மேய கிடைக்கிறது. வாரக்கடைசியில் இதற்கு இன்னும் அதிகமாகவே நேரம் கிடைக்கும்.

கொஞ்சம் பின்னோக்கிப்பார்த்தால், இந்த 8 மணி நேரத்தில் பாதிக்கு மேல் தமிழ்மணத்தில் தான் செலவழிக்கிறேன் என்று தெரிகிறது.

முதலில் தமிழ்மணத்தின் முகப்பு பக்கத்தில் ஏதாவது புதிய பதிவு இருக்கிறதா என்று ஒரு பார்வை. அதில் சுவாரசியமாக எதுவும் இல்லாவிட்டால், சமீபத்தில் மறுமொழியப்பட்டவை, அதையும் படித்து முடித்தவுடன் வெறுமையாக இருக்கும்.
பிறகு, விகடன், குமுதம், தமிழோவியம், பீபீசீ, கூகிள் செய்திகள்,கூகில் மின்னஞ்சல், யாஹூ மின்னஞ்சல், மீண்டும் தமிழ்மணம், கொஞ்சம் அலுவலக வேலை, மதிய உணவு இடைவேளை, திரும்பியவுடன் மின்னஞ்சல்கள், தமிழ்மணம், புதிய பதிவுகள் எதுவும் இருந்தால் அதை முடித்துவிட்டு வேறு எதுவும் இல்லாவிட்டால் அலுவலக வேலை.

இப்படியே பொழுது போய் விடுகிறது. சிலசமயத்தில் நேரத்தை வீணடிக்கின்றேனோ என்று ஒரு கவலை ஏற்படுகிறது. இந்த நேரத்தை வேறு எதற்காகவாவது உபயோகமாக செலவழித்திருக்கலாமோ என்று சிந்தனை.

இந்த பதிவை சீக்கிரம் முடித்து விட்டு, mail check பண்ண வேண்டும், தமிழ் மணத்தில் வேறு ஏதாவது பதிவுகள் இருக்கிறதா என்று பார்க்க வேண்டும். நிறைய வேலை இருக்கிறது.

தமிழ் வலைப்பதிவுகள் மட்டும் இருந்திருக்காவிட்டால்!!!!!!

Black - உலக தரத்தில் ஒரு இந்திப்படம்.

2005-05-16T20:47:00.000+01:00

இந்தப் படத்தை ரொம்ப நாளாகவே பார்க்க வேண்டும் என்று எண்ணிக்கொண்டிருந்தேன். இப்போது தான் பார்க்க நேர்ந்தது.

Hellen Keller -ன் வாழ்க்கையை தழுவி எடுக்கப்பட்ட படம்.

கதை என்ன?.... ஒரு வரியில் சொல்வதானால்,

பிறவியிலேயே கண் தெரியாத, காது கேட்காத ஒரு பெண், ஒரு நல்ல ஆசிரியரின் வழிகாட்டுதலால் என்ன சாதிக்கிறாள் என்பது தான்.

இந்த படத்தை பார்ப்பதற்கு முன்பு, கண்களை மூடிக்கொண்டு ஒரு நிமிடம் யோசித்துப்பாருங்கள், கண் தெரியாமல் காது கேட்காமல் வாழ்க்கை எப்படி இருக்கும் என்று.

ரவி கே சந்திரனின் அருமையான ஒளிப்பதிவும்,
அமிதாப், ராணி முகர்ஜி, சிறு வயது ராணி முகர்ஜி(பெயர் தெரியவில்லை)- இவர்களது அருமையான நடிப்பும்,
சஞ்சய் லீலா பன்சாலியின் எந்த வித compromise இல்லாத இயக்கமும் படத்தை தூக்கி நிறுத்துகின்றன.
இவர்கள் அனைவருக்கும் இந்த வருடம் தேசிய விருது நிச்சயம்.

இந்த படம் சரியாக ஒடியதா என்று தெரியவில்லை.

முடிந்தால் கண்டிப்பாக பாருங்கள்.

சிறந்த 50 தமிழ் படங்கள்..

2005-05-11T20:25:00.000+01:00

சில நாட்களுக்கு முன்பு அல்வாசிட்டி விஜய் அவர்கள் சிறந்த 100 உலகப்படங்களின் பட்டியலை வெளியிட்டார்.
அவைகள் ஒவ்வொன்றாக பார்க்க தொடங்கிவிட்டேன்.

எனக்கு பிடித்த சிறந்த தமிழ்படங்களின் பட்டியல் ஒன்றை வெளியிடலாம் என்று தோன்றியது.

இதோ உங்களுக்காக,

சிறந்த 50 (எந்த வரிசையிலும் இல்லை)

அஞ்சலி
கன்னத்தில் முத்தமிட்டால்
கேளடி கண்மணி
குணா
மௌன ராகம்
சேது
சிந்து பைரவி
விருமாண்டி
மகாநதி
அழகி

முதல் மரியாதை
காதல்
இதயம்
புதிய பாதை
மூன்றாம் பிறை
விடுகதை - அகத்தியன்
காதலிக்க நேரம் இல்லை
திருவிளையாடல்
தில்லானா மோகனாம்பாள்
புதுப்புது அர்த்தங்கள்

இயற்கை
காதலுக்கு மரியாதை
பதினாறு வயதினிலே
நெஞ்சம் மறப்பதில்லை
வானமே எல்லை
கல்யாண பரிசு
நாயகன்
வீடு
குட்டி
தண்ணீர் தண்ணீர்

இருவர்
ஹவுஸ் புல்
ரோஜா
கடல் பூக்கள்
இந்தியன்
கண்டுகொண்டேன் கண்டுகொண்டேன்
முள்ளும் மலரும்
கருத்தம்மா
வேதம் புதிது
மண்வாசனை

கல்கி
மௌன கீதங்கள்
அலைபாயுதே
ஹே ராம்
இந்திரா
கோகுலத்தில் சீதை
குருதிப்புனல்
அவதாரம்
சிப்பிக்குள் முத்து
மெட்ராஸ் டு பாண்டிச்சேரி

இன்னும் நிறைய இருக்கின்றன. முடிந்தால் நினைவு படுத்துங்கள்.

மொட்டை மாடியில்...

2005-05-10T20:52:00.000+01:00

என்னவோ தெரியவில்லை.

நான் சண்முகா பொறியியல் கல்லூரியில் படிக்கும் போது என் நண்பர், மூத்த மாணவர் ப்ரேம் ராஜ் எழுதிய ஒரு கவிதை நினைவுக்கு வந்தது.

முதிர் கன்னி,

பொன்னகைகள்
இல்லாததால்
புண்ணாகிப்போன
புன்னகைகள்.

வாரக்கடைசியில் நாங்கள் எல்லாம் மொட்டை மாடியில் உட்கார்ந்து கொண்டு பாலகுமாரனின் நாவல் பற்றியும் புதுக்கவிதை பற்றியும் பேசிக்கோண்டு கோண்டிருப்போம்.

ஒத்த அலைவரிசையுடன் சிந்திப்பவர்கள் கிடைப்பது இந்த இயந்திர வாழ்க்கையில் கடினமாகிவிட்டது.

அந்த காலம் திரும்ப வருமா?......

பொன்னியின் செல்வன், சிவகாமியின் சபதம் படிக்க வேண்டும்

2005-05-09T20:39:00.000+01:00

பொன்னியின் செல்வன், சிவகாமியின் சபதம் படிக்க வேண்டும் என்று ரொம்ப நாள் ஆசை.

யாராவது இந்தியா சென்று திரும்புவர்களிடம், எனக்கு ஒரு புத்தகம் வாங்கி வரச்சொல்ல வேண்டும் அல்லது நண்பர்களை வாங்கி அனுப்ப சொல்ல வேண்டும் என்று நினைத்துக் கொண்டு இருந்தேன்.

சும்மா வலைமேய்ந்து கொண்டு இருந்த போது தான் 'ப்ராஜெக்ட் மதுரை' கண்ணில் பட்டது.
ஆஹா எவ்வளவு அருமையான காரியம் பண்ணியிருக்கிறார்கள். கோடி கொட்டி கொடுக்கலாம். தொல்காப்பியத்திலிருந்து, ஜெயகாந்தன் சிறுகதைகள் வரைக்கும் அனைத்தையும் pdf format -லும் வைத்திருக்கிறார்கள்.

அவசர அவசரமாக முதலில் பொன்னியின் செல்வன் மற்றும் சிவகாமியின் சபதம் இரண்டையும் இறக்கி வைத்துள்ளேன்.

இன்னொரு பத்து நாளைக்கு வெட்டியாக வலைமேய வேண்டிய அவசியம் இல்லை.

இங்கிலாந்தில் தேர்தல்..

2005-05-08T21:55:00.000+01:00

எனக்கு தெரிந்த அனைத்து பிரிட்டிஷ் நண்பர்களும் மிகவும் ஆச்சரியப்பட்டார்கள்.
எனக்கும் மிகவும் ஆச்சரியம் தான்.

ஏனென்று கேட்கிறீர்களா?. இங்கிலாந்தில் வசிக்கும் அனைத்து காமன்வெல்த் நாட்டு பிரஜைகளுக்கும் இங்கு ஓட்டு உரிமை உள்ளது.

சரி, ஓட்டு போடலாம். யாருக்கு போடுவது என்பதில் ஒரே குழப்பம். இருப்பது மூன்றே கட்சிகள்.

1) லேபர் - இராக் போரினால் டோனி பிளேர் மீது கோபம். ஆனால் இவரது ஆட்சியில் பொருளாதாரம் நன்றாக இருக்கிறது.
2) கன்செர்வேடிவ் - இவர்கள் ஆட்சிக்கு வந்தால் இங்கு இருக்கும் அனைத்து வெளி நாட்டவரையும் திருப்பி அனுப்பி விடுவார்களோ என்ற பயம்.
3) லிபரெல் டெமாக்ரேட் - மேலே இருக்கும் இருவரையும் பிடிக்காதவர்கள் இவர்களுக்கு வோட்டு போடலாம்.

இன்னோரு ஆச்சரியமான விஷயம். தேர்தல் தினத்தன்று இங்கு விடுமுறை கிடையாது.
மேடைப்பேச்சு கிடையாது. கட் அவுட் சமாச்சரங்கள் கிடையாது.

என்ன தேர்தலோ போங்கள்.

லண்டனில் சரவண பவன்.

2005-05-08T21:36:00.000+01:00

ஆஹா !!

எவ்வளவு நாள் ஆதங்கம்.

லண்டன் வெம்பிளியில் ஆரம்பித்திருக்கிறார்கள்.

நேற்று சரவண பவனுக்கு சென்றிருந்தேன். அதே சுவை. கொஞ்சமும் மாறாமல் இருந்தது.
ரொம்ப நாள் கழித்து ரோம்பவும் அனுபவித்து சாப்பிட்டோம்.

நிஜமாகவே, காய்ந்து போய் இருக்கிறோம். எந்த ரெஸ்டாரெண்ட் போனாலும் அது பங்களாதேஷ் அல்லது பாகிஸ்தானிகள் நடத்தும் இந்திய ரெஸ்டாரெண்ட்-ஆகவே இருக்கிறது.

ஆரம்பித்தவருக்கு நன்றிகள். என்னைப்பொருத்தவரை இது ஒரு பிஸினெஸ் இல்லை. சேவை.

பாலகுமாரன்.

2005-05-08T00:33:00.000+01:00

என்னை பாதித்த எழுத்தாளர்களில், எழுத்துக்களில் என்னை மிகவும் பாதித்தவர் திரு பாலகுமாரன் அவர்கள்.

பாலகுமாரன் அவர்கள் எழுதிய அனைத்து நாவல்களையும் படித்திருக்கிறேன்.

நான் இங்கிலாந்திற்க்கு, வந்த பிறகு நான் மிகவும் miss பண்ணுவது பாலகுமாரன் அவர்களின் நாவல்களைத்தான்.

இங்கு வலைப்பதியும், படிப்பவர்களில் பாலகுமாரன் விசிறிகள் யாரும் இருக்கிறீர்களா?

இன்றிலிருந்து தமிழில்....

2005-05-07T23:54:00.000+01:00

அனைவருக்கும் வணக்கம்.

தமிழில் எழுதி ரொம்ப நாள் ஆயிற்று. இந்த வலைபதிவில், நான் வசிக்கும் இங்கிலாந்து நாட்டில் என்னை பாதித்த சுவாரசியமான நிகழ்ச்சிகளை பதியலாம் என்று முடிவெடுத்திருக்கிறேன்.

நான் முதன் முதலில் வாசித்த 'பத்ரி' யின் வலைப்பதிவுக்கும், தமிழ் வலைப்பதிவாளர்களுக்கு ஒரு பொது நுழை வாயிலை ஏற்ப்படுத்திய மற்றும் தமிழில் யுனிக்கோடு பற்றி அருமையான கட்டுரை எழுதிய சித்தூர்க்காரர் காசி அண்ணனுக்கும், அல்வா சிடியில் போட்டு தாக்கும் விஜய்க்கும், அருமையான பின்னூட்டம் எழுதும் நரேனுக்கும், மாலனுக்கும், பரபரப்பான செய்திகளை தொகுத்து வழங்கும் காஞ்சி பிலிம்சுக்கும், மீனாக்ஷ், தங்க மணி,முத்து முத்து, தேசிகன் மற்றும் அனைவருக்கும் வணக்கம், நன்றி.

இன்று முதல், வாரம் இருமுறை பதியலாம் என்று முடிவெடுத்திருக்கிறேன்.

சந்திப்போம்.